दाहालयात थारूतय्सं पत्याः मयात
टिकापुर घटनाया मुद्दा लित काइ धइगु धापूयात आलोचना
येँ – सत्तारुढ दल नेकपाया अध्यक्ष पुष्पकमल दाहालं टिकापुर घटनाय् ज्वनातःपिं थारू नेतातय्त सरकारं याकनं त्वःतेत्यंगु दु धकाः बियादीगु अभिव्यक्तियात स्वयम् थारू न्ह्यलुवातय्सं ‘झुठया सामाज्या’ धकाः आलोचना याःगु दु ।
अध्यक्ष दाहालं म्हीग थारूतय् तःधंगु नखः जितिया पर्वया लसताय् जूगु छगू ज्याझ्वलय् न्ववासें थुकिया बारे राजनीतिक सहमति जुइधुंकूगु व आः याकनं हे जेलय् लानाच्वंपिं थारू नेतातय्त त्वःती धयादीगु खः । तर वय्कलं बियादीगु थ्व अभिव्यक्तियात स्वयम् थारू न्ह्यलुवा–तय्सं हे पत्याः धाःसा मयाः ।
आइतवाः सुनसरीइ दाहालं टिकापुर घटनाया ‘झुठा मुद्दा’ खारेज यायेगु विषयय् छुं ई न्ह्यः वालुवाटारय् सैद्धान्तिक सहमति जुइधुंकूगु खँ समेत कनादीगु खः । थौंकन्हय् पुनरावेदनय् मुद्दा चले जुयाच्वंगु थ्व विषयय् मुद्दा हे खारेज यायेगु प्रक्रिया तकं न्ह्यायेधुंकूगु व याकनं हे जेलय् च्वपिंत त्वःतीगु दावी वय्कलं यानादीगु खः ।
दाहालं टिकापुर घटनाय् ज्वनातःम्ह सांसद रेशम चौधरीयात समेत त्वःतीगु आश्वासन नं बियादीगु खः । अध्यक्ष दाहालया उगु धापूयात थारुवान राष्ट्रिय मुक्ति मोर्चाया कैलाली अध्यक्ष माधव थारुं धाःसा फय्गं आश्वासन धकाः आलोचना यानादीगु दु ।
थारुं धयादीगु दु, ‘दाहालं थ्व स्वयां न्ह्यः नं टिकापुर घटनायात राजनीतिक रुपं स्वयेमाः व राजनीतिक रुपं हे समाधान यायेमाः धयादीगु खः, तर मुद्दा लित कायेगु ज्याय् धाःसा सिन्का छपु नं त्वःथलेगु ज्या मयाः ।’ दाहालं थारूतय् ज्याझ्वलय् वनाः थारूतय्त हे झंगः लायेत्यंगु द्वपं बिसें धात्थें मुद्दा लित कायेगु बारे सरकारी तहपाखें सहमति जूगु खःसा जनताया दथुइ उगु सहमतियात सार्वजनिक यायेत नं थारुं माग यानादिल ।
वय्कलं दाहाल लगायतया नेतातय्सं चाहे जुल धाःसा टिकापुर घटनाया राजनीतिक समाधान घौछिया दुने पिकाये फइ तर उमिसं अथे याये चाहे मजूगु द्वपं नं बियादिल ।
वय्कलं टिकापुर घटनाया छानबिन यायेत गठित पूर्व न्यायाधीश गिरिशचन्द दास नेतृत्वया समितिं बिउगु प्रतिवेदन तकं सार्वजनिक याये चाहे मजूगु सरकारं चौधरीयात ससम्मान रिहा याइ धाःगु नं थारु जातियात ह्ययेकेगु बाहेक मेता छुं मखु धकाः आशंका नं प्वंकादिल ।
२०७२ भदौ ७ गते टिकापुरय् जूगु थरुहट आन्दोलनया झ्वलय् एसएसपी सहित १७ म्ह प्रहरीया ज्यान वंगु खःसा उगु घटनाया सन्दर्भय् रेशम चौधरी सहित न्यय्च्याम्ह थारूतय्त ज्वनाः मुद्दा न्ह्याकूगु खः ।
LEAVE YOUR COMMENTS