हानं निम्ह कोरोना भाइरसं कःपिं विरामी लुल
येँ – चीनं लिहां वःपिं थप निम्ह नेपाःमियात कोरोना भाइरस लूगु आशंकाय् टेकु अस्पतालय् भर्ना याःगु दु । ग्रान्डी अस्पतालं वंगु शुक्रवाः रिफर जुया वःम्ह २८ दँया छम्ह मिजं व चीनय् छगू ज्याझ्वलय् ब्वति कयाः लिहां वःम्ह ४८ दँया छम्ह मिसायात अस्पतालया ‘आइसोलेसन वार्ड’ य् तयाः वासः याकातःगु दु ।
उपिं निम्हेसिकें कोरोना भाइरसया लक्षण ज्वरो वइगु, सेखं चाइगु व सासः ल्हायेत थाकुइगु समस्या खनेदुगु खः । अस्पताल स्रोतया कथं चीनं लिहां वःपिं आपालं मनूत थौंकन्हय् स्वास्थ्य जाँच याकेत अस्पताल वयेगु यानाच्वंगु दु । आः अस्पतालय् आइसोलेसनय् तयातःपिनि अवस्था सामान्य जूगु खँ स्वास्थ्य मन्त्रालयया प्रवक्ता महेन्द्र श्रेष्ठं कनादीगु दु । वय्कःया कथं निम्हं विरामीया पूवंक परीक्षण नेपालय् जूगु खःसा थप परीक्षण याकेत लाःया नमूना हङकङ छ्वःगु दु ।
चीनं लिहां वइपिं यात्रुया जाँच यायेत विमानस्थलय् ‘थर्मल स्क्यानर’ सहित च्याम्ह चिकित्सक व स्वास्थ्यकर्मी दुथ्याःगु ‘हेल्थ डेक्स’ चायेकूगु दु । थ्व स्वयां न्ह्यः पुसया लिपांगु वालय् चीनय् अध्ययन यानाः लिहां वःम्ह छम्ह मेडिकल विद्यार्थीयात कोरोना भाइरस लूगु खः । उम्ह विद्यार्थी माघ ३ गते डिस्चार्ज जुइधुंकूगु दु । तर वयात आः नं अस्पतालया निगरानीइ तयातःगु दनि । नेपालय् नोबेल कोरोना भाइरसया संक्रमण अप्वया वनाच्वंसां विश्व स्वास्थ्य संगठनया मापदण्ड कथंया आइसोलेसन वार्ड मदुगु खँ चिकित्सकतय्सं धाःगु दु ।
थ्वहे झ्वलय् सरकारं केन्द्रीय अस्पतालयात तयारी अवस्थाय् च्वनेत निर्देशन बिउगु दु । स्वास्थ्य मन्त्रालयया प्रवक्ता श्रेष्ठं वीर अस्पताल, शिक्षण, निजामति, पाटन, नर्भिक, केएमसी अस्पतालयात अज्याःगु निर्देशन बिउगु खः ।
थ्वहे झ्वलय् छवाःया दुने टेकुया प्रयोगशालाय् कोरोना भाइरसया परीक्षण व्यवस्था मिले यायेत्यंगु खँ सीदुगु दु । थौंकन्हय् शंकास्पद विरामीया भाइरस परीक्षण यायेत हङकङ छ्वयेगु यानाच्वंगु दु । भारतं ‘रिएजेन्ट केमिकल’ हयेवं थ्व परीक्षण नेपालय् हे याये फइगु खँ धाःगु दु ।
शंकास्पद खनेदुपिं बिरामीया भाइरस परीक्षण यायेगु निंतिं हङकङ छ्वयेबलय् झिन्हु ई काइगु खःसा आः नेपालय् उकिया परीक्षण जुल धाःसा याकनं रिर्पोर्ट वइगु खँ धाःगु दु । नेपालय् भाइरस परीक्षण यायेगु मेसिन दुसां नं उकियात माःगु रिएजेन्ट केमिकल मदुगुलिं टेकु अस्पतालय् कोरोना भाइरसया परीक्षण जुइ फयाच्वंगु मदु ।
LEAVE YOUR COMMENTS