थुगुसी नेवाः एकता दिवस चन्द्रागिरिइ

येँ(नेपालभाषा टाइम्स)- दँय्दसं पोहेलाथ्व नवमिकुन्हु हना वयाच्वंगु नेवाः एकता दिवसया निंतिं तयारी शुरु जूगु दु । थुगुसी १३ क्वःगु नेवाः एकता दिवस चन्द्रागिरि नगरपालिकाय् न्यायेकेगु ल्याखं तयारी जुयाच्वंगु दु ।

नेवाःतय् राष्ट्रिय संगठन नेवाः देय् दबूया पहलय् थ्व दिवस हना वयाच्वंगु खः । थुगुसी थ्व हे वइगु पोहेलाथ्व नवमि (पुस १६) शनिवाःकुन्हु एकता दिवस देय्न्यंकं थीथी ज्याझ्वः यासें हनेगु तयारी जुयाच्वंगु दु ।

वंगु मसिर २५ गते देय् दबूया ज्याकुथिइ च्वंगु छगू मुँज्यां झिंस्वक्वःगु नेवाः एकता दिवस हनेगु तयारी याःगु खः । देय् दबूया केन्द्रीय समितिलिसें स्वनिगः विशेष प्रदेश, स्वनिगःया स्वगुंलिं जिल्ला येँ, यल व ख्वप जिल्ला समितिया पदाधिकारी बैठकं झिंस्वक्वःगु नेवाः एकता दिवस हनेगु तयारी याःगु खः ।

एकता दिवस हनेगु निंतिं च्वंगु मुँज्याय् देय् दबूया नायः पवित्र वज्राचार्य, न्वकु उमेश स्थापित, मूछ्याञ्जे सत्यनारायण डंगोल, स्वनिगः विशेष प्रदेशया नायः श्रीकृष्ण महर्जन, न्वकु सुमन श्रेष्ठ, मूछ्याञ्जे गणेशमान श्रेष्ठ, छ्याञ्जे गंगादेवी महर्जन, येँ जिल्ला नायः धनबहादुर महर्जन तिमिला, यल जिल्ला नायः हेराकाजी महर्जन, ख्वप जिल्ला नायः नरेश नेवाः लगायतया उपस्थिति दुगु खः ।

थौं स्वयां झिंस्वदा न्ह्यः नेवाः स्वायत्त राज्य मंकाः संघर्ष समितिया आह्वानय् थनया त्रिपुरेश्वरय् च्वंगु दशरथ रंगशालाय् लखौं नेवाःत मुनाः नेवाः समुदाय दुने जातीय विभेद मदुगु व नेवाःत सकलें छप्पँ धइगु घोषणालिसें नेवाः स्वायत्त राज्य घोषणा याःगु दिंया लुमन्तिइ दँय्दसं पोहेलाथ्व नवमिकुन्हु नेवाः एकता दिवस हना वयाच्वंगु खः ।
स्वनिगःया थीथी थासय् नेवाः एकता दिवस हनेगु झ्वलय् थनिं दछि न्ह्यः किपू देय्या पांगाय् नेवाः एकता दिवस हंगु खः ।