बागीश्वरीइ पुलांपिं विद्यार्थीतय् अक्षय कोष
ख्वप – बागीश्वरी माध्यमिक विद्यालय च्याम्हसिंहया पुलांपिं विद्यार्थीतय्सं छगू अक्षय कोष नीस्वंगु दु । विद्यालयय् ब्वनाच्वंपिं गरिब व जेहेन्दार विद्यार्थीतय् निंतिं उगु हे विद्यालयय् अध्ययन याःपिं पुलांपिं विद्यार्थीत जानाः छात्रवृत्ति बीगु निंतिं उगु अक्षय कोष नीस्वंगु खः ।
वि.सं. २०४० सालनिसें २०६४ साल तक एसएलसी बिउपिं विद्यालयया पुलंपिं विद्यार्थीतय्सं छात्रवृत्तिया निंतिं अक्षय कोष नीस्वनेत आर्थिक ग्वाहालि याःगु विद्यालयं जानकारी बिउगु दु । २०४७ सालय् विद्यालयपाखें एसएलसी बिउपिं विद्यार्थीपिं रुपेश प्रजापति, विनय प्रजापति लक्ष्मीसुन्दर प्रजापतिया पुचलं कोषया निंतिं धकाः मुंकूगु नीन्याद्वः तका दां विद्यालयया प्राचार्य कृष्णप्रसाद धन्छायात लःल्हाःगु खः ।
नीन्याद्वः तकां शुरु जूगु कोषय् ध्यबा मुनेगु झ्वलय् आतकया दुने कोषय् छगू लख न्यय्खुद्वः व ४७२ तका जम्मा जुइधुंकूगु विद्यालयं जानकारी बिउगु दु । कोषय् थ्व स्वयां न्ह्यः २०४० सालया पुचःपाखें ५,२००/-, २०४१ सालया पुचःपाखें ३२,५५५/-, २०४४ सालया विद्यार्थीपाखें २५,१११/- तका व छगः अंगः ईलचं, २०५२ सालया विद्यार्थीपाखें झिंन्हय्द्वः तका दां नापं छम्ह विद्यार्थीयात नर्सरीनिसें झिगू तगिंतकया वार्षिक शुल्क बराबरया ध्यबा, २०५५ सालया विद्यार्थीपाखें छगूनिसें स्वंगू तगिंतकया खुम्ह विद्यार्थीया निंतिं वसः व छुं आर्थिक ग्वाहालि यायेगु प्रतिवद्धता, २०६० सालया विद्यार्थी पुचःपाखें १८,३००/-, २०६१ सालया विद्यार्थीपाखें ७,६१०/-, २०६२ सालया विद्यार्थीपाखें १७,४२५/- व २०६३ सालया विद्यार्थीपाखें ८,२७० तका जम्म जुइधुंकूगु व कोषय् थप ध्यबा जम्मा जुइगु क्रम जारी दुगु विद्यालयं न्ह्यथंगु दु ।
थुकथं हे छात्रवृत्तिया निंतिं विद्यालयया हे २०५१ सालया विद्यार्थी कृष्णराम प्रजापतिं व्यक्तिगत छगू लाख तका दांया बिस्कं कोष नीस्वनेगु प्रतिवद्धता प्वंकादीगु दु । थुगु दँय् हिरक जयन्ती हनाच्वंगु विद्यालय थ्व हे सन्दर्भय् आतकया दुने स्वक्वःतक पुलांपिं विद्यार्थीतय् भेला यायेधुंकूगु दुसा थुकथं पूर्व विद्यार्थीतय्पाखें कोष स्वनेगु निंतिं कुतः नं जूगु खः ।
पुलांपिं विद्यार्थीतय् लिपांगु भेलाय् विद्यालयया पुलांम्ह प्राचार्य मोहनप्रसाद प्रजापति, प्राचार्य कृष्णप्रसाद घन्छा, कलेजया प्राचार्य धनकुमार श्रेष्ठ, सहप्राचार्य ज्ञानसागर प्रजापति, पुलांपिं विद्यार्थीपिं सम्झना थुसा, विनोद बासुकला, कृष्णराम ग्वाछा व पुनम जोशी लगायतं थःथःगु नुगःखँ तयादीगु खः ।
LEAVE YOUR COMMENTS