नेकपा सचिवालय मुँज्या ४ बजे, मुँज्या न्ह्यः बामदेव बालुवाटारय्

येँ – नेपाल कम्युनिष्ट पार्टी (नेकप)या आन्तरिक विवाद समाधान यायेगु निंतिं सचिवालयया मुँज्या थौं ४ बजे च्वनीगु जूगु दु ।

बुधवाः च्वंगु मुँज्यां थप गृहकार्य यायेमाःगु धकाः थौं तकया निंतिं मुँज्या लिछ्याःगु खः । पार्टी दुनेया आन्तरिक विवाद नापं सरकारया कार्यशैली नापं प्रधानमन्त्री केपी शर्मा ओलीया राजीनामा लगायतया विषयलय् थौंया मुँज्याय् सहलह जुइगु ज्याझ्वः दु । थ्व नापं पार्टीया स्थायी कमिटीया दुजःतय्सं मुँज्या सःतेत याःगु इनापया बारे नं छुं निर्णय जुइगु आशा याःगु दु ।

सचिवालय मुँज्या च्वने न्ह्यः धाःसा पार्टीया नेतात थःथःगु पुचःया नेतातय् दथुइया सहलहयात व्यापक याःगु दु । प्रधानमन्त्री ओलीं थौंया मुँज्याय् थःम्ह म्हितेगु भूमिकाया बारे थः सःतिपिं नेतात नाप सहलह यानादीगु दु ।

उखे मेम्ह अध्यक्ष पुष्पकमल दाहाल ‘प्रचण्ड’ व वरिष्ठ नेता माधवकुमार नेपालं थःपिनिगु सहलहयात तीव्रता बिउगु दु । प्रधानमन्त्री ओलीं राजीनामा बियाः देय्यात निकाश बीमाःगु लाइनय् प्रचण्ड-नेपालं अडान काइगु संकेत खनेदुगु दु । नापं बुधवाःया मुँज्याय् प्रधानमन्त्री ओलीं कोरोनाया संक्रमण लिपाया प्रधानमन्त्री बामदेव गौतम खः धकाः धयादीगु विषयलय् थप स्पष्ट यायेत नं इनाप याइगु जूगु दु ।

थ्वया दथुइ कोरोना भाइरसा संक्रमण लिपाया प्रधानमन्त्री कथं प्रस्तावित नेता गौतम धाःसा मुँज्या न्ह्यः प्रधानमन्त्री ओलीयात नापलायेत प्रधानमन्त्री निवास बालुवाटार थ्यंकादीगु दु । प्रचण्ड-नेपालया पक्षय् दुम्ह नेता गौतम प्रधानमन्त्रीया प्रस्ताव वयेवं ओली क्याम्पय् सःतिनावःगु खँ धाःगु दु । बामदेवया लिप्पांगु पलाःयात कयाः प्रचण्ड-नेपाल सशंकित जूगु दु ।