नेवाः भासं न्ह्यसः, तामाङ भासं लिसः
येँ (नेपालभाषा टाइम्स) – बागमति प्रदेश सभाया मुँज्याय् छम्ह सांसदं नेवाः भासं न्यंगु न्ह्यसःया लिसः मन्त्रीं तामाङ भासं बियादीगु दु । वंगु शनिवाः बागमति प्रदेश सरकारं वइगु आर्थिक दँ २०८३/८४ या निंतिं न्ह्यब्वःगु बजेट बारे सहलह यायेगु झ्वलय् थ्व न्ह्यसः-लिसः जूगु खः ।
प्रदेशया अर्थमन्त्री प्रभात कुमार तामाङं बजेट न्ह्यब्वयेधुंकाः येँ क्षेत्र नं. ९ (क) पाखें सांसद जुयादीम्ह नुरज बज्राचार्यं नेवाः भासं न्ह्यसः तयादीगु खः । वय्कलं प्रदेश सभाय् न्ह्यःब्वःगु बजेटय् थःगु क्षेत्रपाखें ल्ययाः वःगु छु नं योजना खनेमदुगु विषय ल्ह्वनादीगु खः ।वय्कलं थ्व विषयलय् स्पष्ट यानादीत मन्त्री तामाङयात इनाप यानादीगु खः ।
वय्कःया न्ह्यसः लिपा सभामुख भुवनकुमार पाठकं प्रदेश सभादुने भाय् अनुवादकया व्यवस्था दुगुलिं नेवाः भासं न्ववाःगु खँ भाय् हीकाः मन्त्रीयात बीत निर्देशन बियादीगु खः । सभामुखया निर्देशन कथं सांसद बज्राचार्यया न्ह्यसःयात मुँज्याय् भाय् हीकाः मन्त्रीयात लःल्हाःगु खः ।
तामाङ भासं लिसः बिइगु झ्वलय् मन्त्री तामाङंबजेटय् योजनात फुक्कं प्रोजेक्ट बैंक दुनेपाखें हे वःगु जूसां शतप्रतिशत धाःसा मलागु स्वीकार यानादिल । वय्कलं थ्व न्हापांगु पटक जूगुलिं छुटे जूगु योजना मेगु पालय् तयेगु बचं बियादिल ।
प्रदेशसभाय् न्ह्यसः थनादीम्ह सांसद बज्राचार्यं भाषा ऐन लागू जुइधुंकूगुलिं भाय् छ्यलेगु जिम्मेवारी झीगु हे जूगु धयादिल । वय्कलं थःम्ह दक्व थासय् नेवाः भासं हे न्ववायेगु यानाच्वनागु धयादिसें मन्त्रीपाखें थःगु मांभाय्पाखें लिसः वःगु धयागु सकारात्मक विषय जूगु धयादिल । तर नंप्रदेश दुने मुक्कं निम्ह जक अनुवादकत दुगुलिं जनशक्ति अझ अप्वयेकेमाःगु खँ धयादिल ।
न्हापा लिपा जूसा नेवाः व तामाङ भासं न्ववानाः सासंदतय्सं सपथग्रहण यायेगु व संसदय् न्ववाइगु इलय् केवल रेकर्डय् तयेगु ज्या जक जुयाच्वंगु खः। थुगुसी धाःसा न्ह्यसः न्यनीम्ह व लिसः बीम्ह निम्हेसिनं थःथःगु भासं न्ववाःगु खः । थुकथं न्ह्यसः न्यनीम्हेसिनं नेवाः भासं व लिसः बीम्हेसिनं तामाङ भासं न्ववानाः व्यवहारिक रुप काःगु थ्व न्हापांखुसी खः ।
थ्वहे सन्दर्भय् नेवाः देय् दबूया वरिष्ठ न्वकू उमेश स्थापितं थ्व लसताया विषय जूसां अझ नं प्रदेश दुने अनुवादकया व्यवस्था प्रभावकरी ढगं न्ह्यानामच्वंगु धयादिल । वय्कलं थज्याःगु अनुवादकया व्यवस्थाया निंतिं थुगुसीया बजेटय् तकं व्यवस्था मदुगुलिं अनुवादकया जनशक्ति अभावया बारे राज्यं स्पष्ट यायेमाःगु माग यानादिल ।
अथेहे नेपाल तामाङ घेदुङया केन्द्रीय नायः रामकृष्ण ब्लोन तामाङं थःथःगु पहिचान न्ह्यब्वइगु कथं मन्त्री व सांसदं न्ववागु सकारात्मक पलाः जूगु धयादिल । वय्कलं नेवाः व तामाङ भासं न्ववाइगु ज्यायात थ्व छगू घटनाय् सीमित मयासें संस्थागत यायेमाःगु नं धयादिल । वय्कलं धयादी, ‘थ्व छगू दसूया कथं वःगु दु । थ्व घटनां राज्ययात नं छगू कथं दबाव महशुस जूगु जुइमाः । आः राज्यपाखें भाय् हिलेफुपिं जनशक्ति तयार यायेत हथाय् जुइधुंकूगु दु ।’
LEAVE YOUR COMMENTS