येँय् थौं छन्हुं ५३ म्हेसिके संक्रमण

येँ – नेपालय् कोरोना संक्रमितत हाकनं न्हियान्हिथं अप्वया वःगु दु । थुकिया लिसें स्वनिगलय् नं संक्रमण अप्वया वंगु दु । स्वास्थ्य मन्त्रालयं म्हिगः बिउगु जानकारी कथं नेपालय् ३११ म्हेसिके संक्रमण खनेदुगु खः, थुकी मध्ये ५३ म्ह स्वनिगःयापिं लाःगु दु । स्वनिगलय् संक्रमित खनेदुपिं मध्ये ४८ म्ह येँया, प्यम्ह यलया व छम्ह ख्वपया खः । थुकिया लिसें नेपालय् संक्रमिततय् ल्याः नं १९ हजार ६३ म्ह थ्यंगु दु ।

येँय् संक्रमितत मध्ये प्रहरी हेडक्वार्टरय् ज्या यानाच्वंपिं २३ म्ह प्रहरी लाःगु दु । आइतवाः प्यम्ह प्रहरीयात संक्रमण खनेदयेवं उपिं लिसे सम्पर्क दुपिं मेपिंत यानास्वःगु परीक्षणय् २३ म्हेसिके संक्रमण खनेदुगु खः ।

लकडाउन चायेके न्ह्यव तक देन्यंकं कोरोना संक्रमिततय् ल्याः म्हो जुयावंगु खनेदुगु खःसा लकडाउन चायेके धुंकाः हाकनं बुलुहुं संक्रमितत अप्वया वःगु खनेदुगु खः ।