किलागलय् नारायणगोपालया झ्वाता

येँ(नेपालभाषा टाइम्स)- येँ महानगरपालिका १८ वडाया किलागः त्वालय् स्वर सम्राट नारायणगोपाल गुरुवाचार्यया झ्वाता पलिस्था याःगु दु । स्वर सम्राट नारायण गोपाल गुरुवाचार्यया जन्म जूगु छेँया लिक्कसं वय्कःया झ्वाता पलिस्था याःगु खः ।

येँ महानगरपालिका १८ वडाया आर्थिक ग्वाहालि पलिस्था याःगु नारायणगोपालया झ्वाता येँ महानगरपालिका प्रमुख बालेन्द्र शाहं अनावरण यानादीगु खः ।

ज्याझ्वलय् नवासें वडाअध्यक्ष न्हुछेकाजी महर्जनं १८ वडा दुने आपालं स्रस्टाया जन्म जूगु व थौं स्वर सम्राट मदुम्ह नारायणगोपालया योगदानयात लुमंकाः वय्कःया जन्म जूगु थासय् हे झ्वाता पलिस्था याये खंगुलिं लसता प्वंकादिल ।

येँ महानगर १८ वडापाखें थ्व स्वयां न्ह्यः नेपाल कम्युनिष्ट पार्टीया संस्थापक महासचिव पुष्पलाल श्रेष्ठ, नेपाल संवत्या प्रवर्तक राष्ट्रिय विभूति शंखधर साख्वाः, नेपाल संवत् न्हूदँ सांस्कृतिक आन्दोलनया न्ह्युलवा पद्मरत्न तुलाधरया नं झ्वाता पलिस्था यायेधुंकूगु दु ।