‘स्वाब बीवं क्वारेन्टाइनय् च्वँ’

येँ (नेपालभाषा टाइम्स) – कोरोना संक्रमण परीक्षणया निंतिं स्वाब बीपिं हरेक मनूत स्वाब बीधुंकाः आइसोलेसनय् च्वं वनेत सरकारं इनाप याःगु दु । म्हिगः नियमित प्रेस ब्रिफिङया झ्वलय् स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमं स्वाब परीक्षणया निंतिं स्वाब बिउपिंत अनिवार्य आइसोलेसनय् च्वनेत इनाप यानादीगु खः ।

कोरोना परीक्षणया लागिं स्वाब बिउपिंसं थःपिनि परीक्षणया रिपोर्ट वयेधुंकाः थःगु सम्पर्कय् वःपिं सकसिकं उकिया खबर यायेत नं वय्कलं इनाप यानादीगु दु। वय्कःया कथं स्वाब बिउपिं मनूत रिपोर्ट मवःनिवं हे उखेंथुखें घुलमिल जू वनीगु जुयाः लिपा छुं जुयाः संक्रमण पुष्टि जुल धाःसा उमित मालेत हे समस्या जुयाच्वंगु दु ।

मनूतय्त पीसीआर परीक्षण यायेवं हे ल्वय् लनीगु थें भ्रम जुयाच्वंगु जुयाः उपिं स्वाब बीवं उखें थुखें वनेगु यानाच्वंगु दु। यदि संक्रमित जूम्ह लानाच्वन धाःसा वं मेपिंत नं ल्वय् पुंके फइगु खँ धाःगु दु ।