पद्मरत्न लुमंकाः सिकागाेय् न्हूदँ (किपा स्वयादिसँ)

केशरमान ताम्राकारपाखें

नेपाःया मौलिक संवत् न्हूदँ नेपालय् जक मखु, संसारया थीथी देशय् हनेगु याना वयाच्वंगु दु । नेपालं वनाच्वंपिं नेवाःत थीथी देशय् थःथवय् मुनाः नेपाल संवत्या न्हूदँ हना वयाच्वंगु दु । विशेषतः अमेरिका, बेलायत, अष्टे«लिया थें ज्याःगु नेवाःत यक्व दुगु देशय् थीथी शहरय् दँय्दसं थीथी ज्याझ्वः यानाः नेपाल संवत्या न्हूदँ हनेगु याना वयाच्वंगु खः । थ्व हे झ्वलय् वंगु शनिवाः अमेरिकाया सिकागोय् नं ने.सं. ११३९ न्हूदँ छगू ज्याझ्वः यासें तःजिक हन । तर थुगुसीया न्हूदँया ज्याझ्वः धाःसा न्हापालिपा स्वयां भचा बिस्कं जुल ।

थुगुसी सिकोगोय् न्हूदँ हनेगु झ्वलय् नेपाल संवत् आन्दोलनया प्रणेता नेवाः न्ह्यलुवाः पद्मरत्न तुलाधरयात लुमंकल । न्हूदँया न्यान्हु न्ह्यव जक मदुम्ह तुलाधरयात लुमंकाः छगू मिनेट मौन धारण यासें ज्याझ्वः न्ह्याकूगु खः ।

नेवाः अमेरिकन दबूया ग्वसालय् जूगु ज्याझ्वलय् दबुलिं दँय्दसं पिथना वयाच्वंगु दबूया ख्वाःपौ ‘सिकागो नेवाः’ च्यागूगु ल्या नं विमोचन याःगु खः । सिकागोया ज्याथिम्ह मय्जु ईश्वरी श्रेष्ठं उलेज्या यानादीगु ज्याझ्वलय् श्याम श्रेष्ठ व ज्ञानु श्रेष्ठं ख्वाःपौ विमोचन यानादीगु खः ।

ज्याझ्वलय् सिकागोय् च्वनाच्वंपिं सत्याः मल्याक नेवाः व गैर नेवाःतय्सं ब्वति काःगु खः । वय्कःपिंत दबूया दुजःपिंसं लसकुस म्ये हालाः व नायः उदय महर्जनं न्वचु बियाः लसकुस यानादीगु खः । अथेहे ज्याझ्वलय् अन हे च्वनाच्वंपिं मस्तय्सं नेवाः म्येँय् प्याखं हुला क्यंगु खःसा फेसन शो नं याःगु खः । अथेहे नेवाः म्येँ नं हालाः न्यंकूगु खः । थ्व झ्वलय् धिमे बाजं थानाः हल दुने साँस्कृतिक ¥याली नं याःगु खःसा ब्वति काःपिंत ख्येँ सगं बियाः म्हपुजाया क्वखा नं क्वखायेकूगु खः ।

थुगुसी सिकागो नेवाः पत्रिकायात नेवाः एमएमपाखें सम्मान याःगुलिं पत्रिकाया सम्पादक व पुलांम्ह नायः केशरमान ताम्राकारं एफएम परिवारयात सुभाय् नं देछायादीगु खः । अथेहे दबूया दुजः विवेक श्रेष्ठं ज्याझ्वलय् ब्वति काःपिं लिसें ज्याझ्वः ताःलाकेत ग्वाहालि यानादीपिंत सुभाय् नं देछायादीगु खः ।