ने. सं. ११४४ कौलाथ्व षष्ठी -

मुख्यमन्त्री कार्कीयात नं लिना छ्वत

येँ (नेपालभाषा टाइम्स)- पूर्वी नेपाःया प्रदेश नं. १ या नां कोशी प्रदेश तःगु विरुद्ध आन्दोलन याना वयाच्वंपिं आन्दोलनकारीतय्सं साेमवाः झापाय् प्रदेश १ या मुख्यमन्त्रीयात नं हाकुगु ध्वाँय् क्यनाः ख्याना छ्वःगु दु ।

झापाया उर्लावारीस्थित मंगलबारे धाःगु थासय् मुख्यमन्त्री हिक्मत कार्की वइगु लँय् च्वनाः हाकुगु ध्वाँय् क्यनाच्वंपिं पहिचानवादीत खनेवं कार्कीया गाडी मेगु हे लँपु जुयाः बिसिउँ वंगु खः । अन मुनाच्वंपिं प्रदर्शनकारीतय्सं कार्कीयात हाकुगु ध्वाँय् क्यनाः नाराबाजी समेत याःगु खः ।

उगु इलय् ‘लिम्बुवान भोलिन्टियर्स’ च्वयातःगु टीशर्ट फिनातःपिं आपालं कार्यकर्ता लिसें मिसा व मिजं प्रदर्शन–कारीत नं सहभागी जूगु खः ।

थ्व स्वयां न्ह्यः प्रदेश १ या पहिचानवादीतय्सं एमालेया अध्यक्ष केपी ओलीयात थीथी थासय् हाकुगु ध्वाँय् क्यनाः प्रदर्शन याना वयाच्वंगु खः । एमाले अध्यक्ष ओलीं थ्व ज्या पुलांम्ह जुजु ज्ञानेन्द्रं याकाच्वंगु धकाः द्वपं बियादीगु दु । म्हिगः उर्लावारीइ जूगु कोणसभाय् न्ववाःपिं प्रदर्शनकारीतय्सं अध्यक्ष ओलीया थ्व द्वपंयात नं खण्डन यासें लिसः बियाछ्वःगु खः ।

थ्वहे झ्वलय् प्रदेश १ या पहिचान–वादीतय्सं आः राई लिम्बु समुदायया नखःयात नं पहिचान आन्दोलनया रुपय् हनेगु निर्णय याःगु दु । उमिसं थ्वहे वइगु वैशाख २२ गते कुन्हु लाःगु लिम्बु समुदायया तःधंगु नखः साकेन्वा साकेलायात पहिचान पक्षधर आन्दोलनया रुपय् न्यायेकेगु धकाः निर्णय याःगु दु । वकुन्हु साकेला नखः हनेगु लागिं येँया फिब्व ख्यलय् प्रदर्शन यायेगु ग्वसाः याःगु दु ।

कोशी प्रदेश विरुद्ध पुनः नामाकरण संयुक्त संघर्ष समितिं वकुन्हु येँया फिब्व ख्यलंनिसें न्हूगु वानेश्वराय संसद भवन तक यातायात तकं बन्द यानाः छस्वाः जुइक ज्याझ्वः यायेगु घोषणा याःगु दु । उकिया लागिं प्रदर्शनकारीतय्सं नखः व पहिचानया आन्दोलनयात स्वानाः छपु म्ये नापं तयार याःगु दु ।

प्रदर्शनकारीतय्सं पूर्वया थीथी जिल्लाय् थौंकन्हय् न्हिंन्हिं हे सभा, प्रदर्शन व ¥याली समेत आयोजना यानाः पहिचान आन्दोलनयात तच्वयेक न्ह्याकाच्वंगु दु ।