अस्पताल हाकनं जाया वल, निषेधाज्ञा कडा

येँ -स्वनिगलय् कोरोना संक्रमितया ल्याः अप्वया वयेवं अस्पतालत नं धमाधम जाया वनेगु क्रम शुरु जूगु दु । स्वनिगःया थीथी अस्पतालय् कोरोनाया विरामी वयेगु क्रम अप्वया वंगुलिं कोरानाया स्वंगूगु लहर वःगु धासें सरकारं सचेत जुइत सर्वसाधारण जनतायात इनाप याःगु दु । म्हिगः जक देय्न्यंकं ३३८३ म्ह न्हूपिं संक्रमित लूगु खः ।
विरामी अप्वयेवं वीर, टिचिङ, पाटन, सशस्त्र प्रहरीया कोरोना बेड धमाधम ‘ओकुपाई’ जुजुं वनाच्वंगु खँ धाःगु दु ।

स्वास्थ्य तथा जनसंख्या मन्त्रालयया कथं कोरोनां कयाः म्हिगः जक २४ म्ह सीगु दुसा १९९४ म्ह संक्रमणं मुक्त जूगु दु । उकथं हे देय्न्यंकं संक्रमितया ल्याः ६ लाख ६० हजार थ्यंगु दु । थौंकन्हय् देय्न्यंकं ३२ हजार ५९ म्ह सक्रिय संक्रमित दु ।

थ्वहे झ्वलय् स्वनिगलय् तयातःगु निषेधाज्ञा छवाः थप याःगु दु । म्हिगः च्वंगु स्वनिगःया प्रमुख जिल्ला अधिकारीतय् बैठकं वइगु साउन २७ गते तकया नितिं निषेधाज्ञा थप याःगु खः । थ्व स्वयां न्ह्यः साउन २० गते तक निषेधाज्ञा तयातःगु खः ।

म्हिगः येँ जिल्लाया सीडीओपाखें छगू सुचं जारी यासें आः थन छुं नं कथंया सभा सम्मेलन, ¥याली मयायेत, पार्टी प्यालेस, सिनेमा हल, आदि भिडभाड जुइगु थाय् सञ्चालन मयायेत निर्देशन बिउगु दु । लिसें शैक्षिक संस्था नं आःयात बन्द हे जुइगु खँ धाःगु दु । परीक्षा धाःसा स्वास्थ्य मापदण्ड पालना यानाः सञ्चालन यायेगु निर्णय याःगु दु ।

येँय् भीडभाड जुइगु ज्याझ्वलं यानाः कोरोना संक्रमित जुइपिनिगु ल्याः अप्वया वनाच्वंगु धासें उगु इनाप याःगु खः ।

सम्बन्धित बुखँ

LEAVE YOUR COMMENTS