वाम गठबन्धनया सरकारय् माधव नेपाल असहमत

येँ (नेपालभाषा टाइम्स)- नेकपा एकीकृत समाजवादीया अध्यक्ष माधव नेपालं बाम गठबन्धनया सरकार दयेकेगु गुगुं नं सम्भावना मदुगु खँ धयादीगु दु । म्हिगः पार्टी ज्याकुथिइ च्वंगु सचिवालय बैठक लिपा सञ्चारकर्मीतलिसे खँ ल्हासें वय्कलं उगु खँ धयादीगु खः ।

वय्कलं वर्तमान गठबन्धन दलत लिसे सहकार्य न्ह्यःने यंकेगु खँ धासें धयादिल, ‘गठबन्धन दलतलिसे गुगु सहकार्य दु, उकियात हे आः न्ह्यःने यंकेमाः धकाः जिमिसं तायेकागु दु । ल्यं दनिगु ज्याखँ राजनीतिक घटनाक्रम लिसें क्वःजी ।’

गठबन्धनया सरकार दयेके फइ वा मफइ धइगु खँ चुनावी लिच्वः पूवंक वयेधुंकाः प्रस्ट जुइ धासें वय्कलं आः नं छुं छुं निर्वाचन केन्द्रय् मतदान यायेगु ज्या ल्यं दनिगु जुयाः उकिया लिच्वः वयेधुंकाः जक थःपिनि धारणा दयेकेगु खँ नं धयादिल ।

वय्कलं राष्ट्रिय राजनीति गनं दक्षिणपन्थी दिशापाखे वनाच्वंगु जकं मखुला धासें धयादिल, ‘राष्ट्रिय राज–नीति आः गुगु दिशापाखे न्ह्यःने वनी धइगु सन्दर्भय् जिमिसं गम्भीर चिन्तन मनन याना । देय् गनं दक्षिणपन्थी दिशापाखे वनीगु जकं मखुला धइगु खँयात झीसं गम्भीरतापूर्वक कायेमाःगु व सतर्क जुइमाःगु आवश्यकता महसुस याना ।’

उकथं हे वय्कलं सत्ता गठबन्धनयात आः नं निरन्तरता बीगु निर्णय जूगु खँ धासें धयादिल, ‘गुगु मत परिणाम जिमित वःगु दु, व जिमिसं साचे याना थें मजू, तर गठबन्धनया कारणं प्राप्त जूगु उपलब्धीयात झीसं रक्षा यायेमाःगु धइगु निष्कर्षय् जिपिं थ्यना । गठबन्धनया भावना कथं कन्हय् नं ज्या यायेमाः धइगु निष्कर्षय् जिपिं थ्यनागु दु ।’

थौंकन्हय् एमालेपाखें वर्तमान सत्ता गठबन्धनयात त्वाःथलाः थःपिं सहितया सरकार दयेकेगु रणनीति तयार यानाच्वंगु खँ पिहां वःगुलिं गठबन्धनय् समस्या पिहां वइगु खतरा खने दया वःगु दु ।