डबल हेलमेटयात कडा विरोध

येँ – ट्राफिक प्रहरीं मोटरसाइकलया लिउने च्वनीम्ह मनुखं नं अनिवार्य हेलमेट पुने मालीगु नियम हानं हइगु समाचार सार्वजनिक जुइवं सामाजिक सञ्जालय् उकिया व्यापक विरोध शुरु जूगु दु ।
ट्राफिक प्रहरीं म्हिगः तिनि छगू पत्रकार सम्मेलन यासें लिउने च्वनीम्हेसित नं हेलमेट अनिवार्य यायेगु तयारी यानाच्वनागु धकाः जानकारी बिउगु खः । थीथी अनलाइनय् थ्व समाचार सार्वजनिक जूगुयां छुं घौ लिपा हे थुकिया विरुद्ध सामाजिक सञ्जालय् प्रहरी शुरु जूगु खः ।
सञ्जालय् थःगु बिचाः तयाहःपिं मनूतय्सं ट्राफिक प्रहरीं हेलमेट कम्पनी वा व्यापारीतलिसे साँठगाँठ यानाः थज्याःगु निर्णय यायेत्यंगु धकाः आक्रोश प्वंका हःगु खः । न्हापा छक्वः नं लिउने च्वनीम्हेसित हेलमेट अनिवार्य याःबलय् थप हेलमेट मदुपिं मनूतय्सं थःथितिपिंत तकं मोटरसाइकलय् तयाः यंके मफुगु, गनं मोटरसाइकल दिका तःसा हेलमेट खुया यंकीगु, बुराबुरिपिंत हेलमेट पुंके मछिंगु आदि समस्या जूगु खँ लुमंकाः ट्राफिक प्रहरीया थ्व तयारीया विरोध याना हःगु खः ।
ट्राफिकं धाःसा अप्वः धइथें मोटर–साइकल दुर्घटनाय् हेलमेट मदयाः हे मनूया ज्यान वनीगु तथ्यांक पिहां वःगु दु धासें हानं थ्व नियम लागू याकेगु खँ पित हःगु खः । ट्राफिकं थुकिया लागिं तयारी यायेधुंकूगु दुसां सरकारलिसे सल्लाह यानाः जक थुकियात लागू याकेगु खँ धाःगु दु ।
थ्वहे झ्वलय् थौंकन्हय् यातायात व्यवस्था विभागं वितरण याना तःगु स्मार्ट लाइसेन्स आपालं नकली पिहां वःगु जूगुलिं आः लँय् लँय् अज्याःगु लाइसेन्स नकली खः कि सकली खः चेक यायेगु लागिं थप मेशिन हयेगु खँ नं धाःगु दु ।

सम्बन्धित बुखँ

LEAVE YOUR COMMENTS