फागुन ७ गते निसें न्हूगु जनओन्दोलन न्ह्याकेगु घोषणा

येँ- वइगु फागुन ७ गते प्रजातन्त्र दिवस कुन्हु निसें स्वक्वःगु जनआन्दोलन न्ह्याकेगु घोषणा याःगु दु । प्रधानमन्त्री केपी ओलीं संसद विघटन याःगु विरुद्ध सतकय् कुहां च्वंपिं ‘वृहत नागरिक आन्दोलन’या नेतृत्व यानाच्वंपिंसं प्रजातन्त्र दिवस कुन्हु लाकाः प्रजातन्त्र हनन विरुद्ध न्हूगु जनआन्दोलन न्ह्याकेगु खँ धाःगु दु ।

वृहत नागरिक आन्दोलन पाखें मंगलवाः शोभाभगवति जूगु प्रदर्शनया झ्वलय् न्ववासें पत्रकार नारायण वाग्लें प्रतिगमन विरुद्ध फागुन ७ गते निसें न्हूकथं आन्दोलन न्ह्याकेगु व उकुन्हु हे नागरिक आन्दोलन पाखें घोषणापत्र सार्वजनिक यायेगु खँ धयादीगु खः ।

शहीद गंगालाल व दशरथ चन्दयात झन्डे याःगु थाय् शोभा भगवती मंगलवाः आन्दोलनपाखें रचनात्मक विराध ज्याझ्वः जूगु खः । ज्याझ्वलय् न्ववासें सहीदतय्सं प्रजातन्त्रया निंतिं ज्यान बिउगु ७० दँ लिपा हाकनं प्रजातन्त्रया निंतिं ल्वायेमाःगु अवस्था वःगु खँ वाग्लें धयादीगु खः । थ्व झ्वलय् वय्कलं फागुन ७ गते तिंख्यलय् सेनांतयातःगु तारबार चिइकाः सभा यायेगु खँ धयादीगु खः ।

‘व थासय् झीगु हक दु, व थासय् तारबार चिइकाः सभा यायेगु जुइ, आन्दोलनया घोषणापत्र सार्वजनिक यायेगु जुइ, थुकी सकसितं सहभागी जुइत आह्वान यानाच्वना’ वाग्लें धयादीगु दु, ‘राणाकालय् जक न्ह्याथाय् नं तारबार तयाः नागरिकयात बन्देज तइगु खः, आः नं बालुवाटार, सिंहदरबारय् थथे हे तारबार तयाः नागरिकया अधिकार कुण्ठित यानाच्वंगु दु, उकीयात चिइकेत थ्व आन्दोलन जुइ ।’

मंगलवाः जूगु प्रदर्शनय् जनकवि दुर्गालाल श्रेष्ठं नेवाः भासं कविता न्यंकादीगु खःसा नेवाः देय् दबूया अध्यक्ष नरेश ताम्राकारं नं न्ववानादीगु खः । अथेहे शहीदतय्त फाँसी बिउगु नाटक नं मञ्चन जूगु खः ।

सम्बन्धित बुखँ

LEAVE YOUR COMMENTS