ने. सं. ११४४ कछलागा षष्ठी -

मेलम्चीया लः येँय् यंकेत ज्या सुरु

येँ (नेपालभाषा टाइम्स)- थगुने वा वयाः अवरुद्ध जूगु मेलम्चीया लः आः हानं येँय् छ्वया हयेगु ज्या सुरु जूगु दु । वा वल धाःसा क्षति जुइफु धकाः वंगु जेठ महिनाय् बन्द याःगु मेलम्चीया सुरुङ आः तक सञ्चालन मयासे तयातःगु खः ।

थुगुसीया वर्षा यामय् सुरुङय् खास हे क्षति मयाःसां आयोजनास्थलतक वनेगु लँ धाःसा अप्वः थासय् स्यंगु खः । उगु सतक दयेकेगु ज्या आः अन्तिम चरणय् थ्यनाच्वंगु खँ मेलम्ची खानेपानी आयोजनाया सिनियर डिभिजनल इन्जिनियर पदमबहादुर कुँवरं कनादिल ।

आः आयोजनाया पुचः मुहान दयेकेगु ज्याय् खटे जुयाच्वंगु दु । आवश्यक उपकरण ज्वनाः थ्व पुचः आयोजनास्थलय् खटे जूगु व खुसि डाइभर्ट लगायत छुं छुं ज्या शुरु यायेधुंकूगु खँ धाःगु दु । थनिंनिसें सुरुङय् म्हुइगु ज्या नं सुरु जुइगु खँ धाःगु दु । सुरुङ दुने खासै क्षति मजूसां सुरुङ पिने नं थगुने स्वयां बछि जक ज्या याःसां गाइगु खँ इन्जिनियर कुँवरं कनादिल ।

आः फयांफछि याकनं हे सुरुङय् लः छ्वयेगु खँ नं वय्कलं कनादीगु दु । वय्कःया कथं लँ अवरुद्ध जुयाच्वंगुलिं आयोजनास्थलय् मेसिन हे यंके मफयाः नं लः हयेत ढिला जुयाच्वंगु खः । विसं २०७८ असार १ या खुसिबालं आयोजनाया बाँध व हेडवक्र्सय् क्षति याना बिउगु खःसा वयां लिपा थुकिया मर्मत यासें २०७९ वैशाख ११ गतेनिसें जेठया स्वंगूगु वाःतक लः यंकेगु ज्या जूगु खः ।

विसं २०७८ असार १ गते सुपरीवेक्षण यायेया लागिं सुरुङ बन्द याःकुन्हु हे तःधंगु खुसिबाः वयाः मेलम्चीया हेडवक्र्स क्षेत्रय् क्षति याना बिउगु खः । गेग्रान चीकेगु ज्या धाःसा चिनियाँ निर्माण कम्पनी सिनो हाइड्रो पावरं याइगु जूगु दु ।