संसद विघटन विरुद्ध कांग्रेसया प्रदर्शन

येँ (नेपालभाषा टाइम्स) – प्रधानमन्त्री केपी शर्मा ओलीं संसद विघटन याःगु विरोधय् म्हिगः नेपाली कांग्रेसं म्हिगः देय्या ३३० गू निर्वाचन क्षेत्रय्प्र दर्शन याःगु दु। म्हिगः येँ जूगु सभाय् न्ववायेगु झ्वलय् कांग्रेस नेता प्रकाशमान सिंहं संविधानयात प्रहार जुयाच्वंगु इलय् थःपिं सुम्क च्वनेमफइगु खँ धयादीगु दु। वय्कलं संविधान दयेकेगु झ्वलय् राजनीतिक अस्थिरता जुइके मबित प्रधानमन्त्रीयात प्रतिनिधिसभा भंग यायेगु अधिकारी मबिउगु धासें संसदं सरकार बीमफइगु अवस्थाय् जक प्रतिनिधिसभा भंग यानाः चुनावय् वनेमाःगु खँ धयादीगु दु ।

मेखे ५ नम्बर क्षेत्रं ग्वसाः ग्वःगु ज्याझ्वलय् न्ववायेगु झ्वलय् कांग्रेस अध्यक्ष शेरबहादुर देउवां धाःसा मेगु हे बिचाः प्वंकादीगु दु। वय्कलं प्रधानमन्त्रीया पलाः संविधान विरोध खःसां नं सर्वोच्च अदालतं छु यात उकियात नालाः वनेमाःगु खँ धयादीगु दु। वय्कलं धयादी, ‘सर्वोच्च अदालतय् विचाराधीन जुयाच्वंगु मुद्दायात कयाः व याः थ्व याः धायेमजिउ, अदालतया निर्णय कांग्रेसं माने याइ ।’ वय्कलं अदालतं मध्यावधि चुनावय् वनेगु प्रम ओलीया पलाःयात सदर यातधाःसा कांग्रेस चुनावय् वनेगु खँ नं धयादीगु दु । वय्कलं धयादिल, ‘सर्वोच्च स्वयां तःधंगु अदालत जनता खः, जनताय् वनेबलय् छु स्यनी ।’