चोभाःया ड्राइपोर्ट सारे यायेत वार्ता

येँ – चोभारय् दयेकेगुत्यंगु ड्राइपोर्ट अनं चीकेगु बारे म्हिगः उद्योग मन्त्री मातृका यादव व स्थानीय जनता दथुइ सहलह जुल । सहलहया झ्वलय् चोभार संरक्षण समितिं चोभाः लागाय् गुगुं नं हालतय् ड्राइपोर्ट (सुख्खा बन्दरगाह) दयेके मजिउगु खँय् बः बिउगु खः ।

सहलहय् संरक्षण समितिं जग्गा सम्बन्धी विवाद, हेटौंडा सिमेन्ट कारखानाया कर्मचारीया समस्या व स्थानीय जनताया समस्या ज्यंकेमाःगु माग मन्त्री यादव समक्ष तःगु खःसा मन्त्री यादवं स्थानीय जनताया माग प्रति थः सकारात्मक जूगु धासें ड्राइपोर्ट दयेकेगु निंतिं थम्हं हे स्थलगत निर्णय यानाः आवश्यक गृहकार्य लिपा जक मेगु बैठकय् निष्कर्ष पिकायेगु बचं बियादीगु खँ समितिया अध्यक्ष पञ्चलाल महर्जनं ‘नेपालभाषा टाइम्स’ यात कनादिल ।

वय्कलं थःपिंसं चोभाः ऐतिहासिक व सांस्कृतिक लागा जूगुलिं अन ड्राइपोर्ट दयेकेगु ज्यां ऐतिहासिक व सांस्कृतिक लागा ध्वस्त जुइगु जूगुलिं अन ड्राइपोर्ट तये मजिउगु अडान तयागु खँ नं कयादिल । ड्राइपोर्ट चोभाःया पलेसा मेथाय् दयेकेगु बारे नं मन्त्री यादवलिसे सहलह खः ।

समितिं चोभारय् अन्तर्राष्ट्रिय स्तरया सम्मेलन केन्द्र दयेकेगु बारे सहलह न्ह्याकेमाः धासें चोभाःयात पर्यटकीय रुपं विकास यायेमाःगु खँय् बःबिउगु खः । वातावरण विज्ञपिंसं नं चोभाः लागाय् ड्राइपोर्ट दयेकेगु खँयात विरोध याना वयाच्वंगु दु । वातावरणविद्तय्सं चोभाः लागा स्वनिगलय् स्वच्छ फय् दुहां वइगु लँपु जूगुलिं उगु लागाय् ड्राइपोर्ट दयेकल धाःसा स्वच्छ फय् दुषित जुयाः उकिया लिच्वः स्वनिगःवासीया स्वास्थ्य व पर्यावरणय् समेत लाये फइगु खँय् सचेत यानाच्वंगु दु ।

सरकारं चोभाःयात ड्राइपोर्ट दयेकाः वीरगञ्ज जुयाः वइगु भारतया कन्टेनर, रेलमार्ग व केरुङ जुयाः वइगु चीनया यातायात व रेलमार्गया अन्तिम विन्दु दयेकेगु तयारी याना वयाच्वंगु खः । तर स्थानीय वासिन्दां उगु आयोजनाया विरोध याना वयाच्वंगुलिं प्रधानमन्त्री केपी शर्मा ओलीं शिलान्यास यायेगु धकाः क्वःजी धुंकूगु ज्याझ्वः नं रद्द यायेमाःगु अवस्था ब्वलंगु खः ।

उगु थासय् ड्राइपोर्ट दयेके हे माः धकाः लबिङ यानाच्वंगु पुचःतय्सं धाःसा उकिया विरोध यानाच्वंपिं स्थानीय जनतायात विकास विरोधी धकाः द्वपं बीगु यानाच्वंगु खँय् नं स्थानीयत तम्वयाच्वंगु दु । म्हिगः जूगु सहलहया झ्वलय् संघीय संसदया सभासद राजेन्द्र केसी, किपू नगरपालिकाया मेयर रमेश महर्जन प्रदेश सभाया सांसद पुकार महर्जन, उद्योग सचिव, वडाध्यक्ष न्हुच्छेबहादुर महर्जन, इन्टरमोडेल विकास समितिया पदाधिकारीपिं दुथ्याःगु खः ।