प्रेस काउन्सिल पत्रकारिता पुरस्कार घोषणा, पुष्पलाल स्मृति पुरस्कार हिरण्यलालयात
येँ (नेपालभाषा टाइम्स) – प्रेस काउन्सिल नेपालं थुगुसीया प्रेस काउन्सिल पत्रकारिता पुरस्कारपाखें पुरस्कृत पत्रकारतय् नां घोषणा याःगु दु। प्रेस काउन्सिल नेपाल ५१ दँ क्यंगु लसताय् पुरस्कृत पत्रकारतय् नां घोषणा याःगु खः ।
प्रेस काउन्सिलपाखें थुगुसीया प्रेस काउन्सिल गोपालदास पत्रकारिता पुरस्कार शम्भु श्रेष्ठ (पाल्पा)यात बीगु जूगु दु। थौंकन्हय् येँय् च्वँच्वनादीम्ह पत्रकार श्रेष्ठयात बीगु उगु पुरस्कार छगू लाख न्यय्छद्वः तकाया खः । अथे हे प्रेस काउन्सिल सुरेन्द्रबहादुर बस्नेत पत्रकारिता पुरस्कार हुम्लाया अर्जुन बोहरायात बीगु जूगु दु। थुगु पुरस्कार छगू लाख झिद्वः तकाया खः ।
थुकथं हे न्यय्द्वः तकाया प्रेस काउन्सिल आचारसंहिता पुरस्कार सेतोपाटी डटकमयात, प्रेस काउन्सिल क्रियाशील पत्रकारिता पुरस्कार गोविन्द क्षेत्री (झापा), राजन कार्की (येँ), धर्मेन्द्र कर्ण (धनुषा), ऋषि धमला (धादिङ), उमेश श्रेष्ठ (येँ)यात बीगु जूगु दु। प्रेस काउन्सिल युवा पत्रकारिता पुरस्कार सटेन्द्र जबेगु (इलाम), सुरेशचन्द्र अधिकारी (चितवन), माधव पौडेल (काठमाडौँ), गणेश चौधरी (कैलाली), गिरिजा अधिकारी (मकवानपुर), राजु वि.क. (सिरहा), कमला श्रेष्ठ (काठमाडौँ), राजन सिंह (धनुषा), देवीकुमारी गुरुङ (रोल्पा), रेणु पराजुली (उदयपुर), दीपेन्द्र वली (सुर्खेत), शेरबहादुर थापा (सुर्खेत), राधिका कँडेल (फोटो पत्रकार, कास्की), शान्ता कमली (लमजुङ) यात बीगु जूगु दु। थ्व सिरपाः म्हतिं
झिंन्याद्वः तकाया खः ।
प्रेस काउन्सिलपाखें बीगु नीद्वः तका दांया साहित्यिक पत्रकारिता पुरस्कार, नव प्रज्ञापन साहित्यिक स्वलापौयात व प्रेस काउन्सिल भाषागत पुरस्कार बाम्बुले राई भाषायात बीगु जूगु दु ।
प्रेस काउन्सिल नेपाल ५० दँ पूरा जुयाः ५१ दँ क्यंगु लसताय् कार्यवाहक अध्यक्ष किशोर श्रेष्ठं छगू भिंतुना सन्देश नं बियादीगु दु। नेपाःया पत्रकारिता ख्यःया नियमनकारी निकाय प्रेस काउन्सिल नेपालया स्थापना २०२७ साल असोज ६ गते जूगु खः ।
थ्व हे झ्वलय् ‘पुष्पलाल स्मृति राष्ट्रिय पत्रकारिता पुरस्कार-२०७६’ पाखें वरिष्ठ पत्रकार हिरण्यलाल श्रेष्ठ सम्मानित जुयादीगु दु। नेपाःया लोकतान्त्रिक आन्दोलनया शिखर पुरुष पुष्पलाल श्रेष्ठया लुमन्तिइ तानसेन नगरपालिकां पुष्पलाल स्मृति राष्ट्रिय पत्रकारिता पुरस्कार कोष नीस्वनाः न्हापांखुसी उगु पुरस्कार वरिष्ठ पत्रकार श्रेष्ठयात लःल्हाःगु खः ।
पुष्पलाल स्मृति दिवसया झ्वलय् वंगु असार १४ गते लःल्हायेगु धाःसां कोरोना भाइरस संक्रमणया कारणं स्थगित जूगु उगु पुरस्कार कोषया विशेष इनापय् राष्ट्रपति विद्यादेवी भण्डारीं लःल्हानादीगु खः । राष्ट्रपति निवासय् जूगु ज्याझ्वलय् कोषया संयोजक शम्भु श्रेष्ठ, प्रेस काउन्सिल नेपालया कार्यवाहक अध्यक्ष किशोर श्रेष्ठ, कोषया सदस्य सचिव गोविन्द भट्टराई लगायतया उपस्थिति दुगु खः । पुरस्कारया राशि छगू लाख
झिंछद्वः व १११ तका दांया खः ।
LEAVE YOUR COMMENTS