येँ महानगर व केयु दथुइ नीतिगत अध्ययन विश्लेषणया निंतिं सम्झौता

येँ – येँ महानगरपालिकां काठमाडौं विश्वविद्यालय स्कुल अफ म्यानेजमेन्टलिसे नीतिगत अध्ययन विश्लेषणया निंतिं सहकार्य याइगु जूगु दु । येँ महानगरपालिका व विश्वविद्यालय दथुइ नीतिगत अध्ययन विश्लेषण यायेगु ल्याखं छगू सम्झौता याःगु खः ।

येँ महानगरपालिकाया राष्ट्रिय सभागृहय् उगु सम्झौता जूगु खः । येँ महानगर प्रमुख विद्यासुन्दर शाक्य व उपप्रमुख हरिप्रभा खड्गी श्रेष्ठया उपस्थितिइ महानगरपालिकापाखें प्रमुख प्रशासकीय अधिकृत राजेश्वर ज्ञवाली व विश्वविद्यालयपाखें स्कुल अफ म्यानेजमेन्टया डीन प्रा. डा. देवी विडारीं सम्झौता पती ल्हाःचिं तयादीगु खः ।

सम्झौताकथं निगुलिं पक्ष मिले जुयाः सुशासन, आर्थिक व सामाजिक समावेशिता विषयय् मंकाः अध्ययन, अनुसन्धान, प्रकाशन, गोष्ठि, सेमिनार लगायतया ज्याझ्वः याइ । थुकथं हे सार्वजनिक नीति प्रयोगशालालिसेया सहकार्यय् पोलिसी आउटरिच सेन्टरया नं स्थापना याइ ।

सम्झौताकथं महानगरपालिकायात विश्वविद्यालयं थ्व स्वयां न्ह्यः जूगु नीतिगत प्रयासया विषयय् अध्ययन विश्लेषण यानाः वइगु दिनय् नीति निर्माण, शैक्षिक ज्याझ्वःपाखें संस्थागत विकास यायेगु थेंज्याःगु ज्याय् ग्वाहालि याइगु महानगरं न्ह्यथंगु दु ।

सम्झौता पती ल्हाःचिं तयेगु ज्याझ्वलय् नवासें येँ महानगर प्रमुख शाक्यं सहरी व्यवस्थापनय् ग्वाहालि यायेकथं शैक्षिक व नीतिगत अनुसन्धानय् आधारित प्रतिष्ठित निकायलिसे सम्बन्ध तयाः ज्या याये खंगुलिं लसता प्वंकादिल । लिसें वय्कलं थःगु क्षमता स्वयां पिनेया ज्या यायेत अज्याःगु ज्याया निंतिं संस्थागत क्षमता, संरचना, अनुभव व जनशक्ति दुगु निकायलिसे सहकार्य यानावनेगु नीतिकथं महानगरं ज्या यानाच्वनागु धयादिल ।

उगु इलय् विश्वविद्यालय स्कुल अफ म्यानेजमेन्टया डीन प्रा. डा. विडारीं महानगरलिसे जूगु सम्झौताकथं महानगरं बिउगु ज्याय् उचितकथंया प्रतिफल बीत थःपिंसं कुतः यायेगु जुइ धयादिल ।
विश्वविद्यालयया ज्या धइगु मात्र ब्वंकेगु व अनुसन्धान यायेगु जक मखु, उकिं थ्व छगू सामुदायिक विकासया निंतिं जूगु कुतः नं खः धासें वय्कलं धयादिल, ‘महानगरं थःपिंत बिउगु ह्वःताःकथं पूर्ण प्रतिफल बीत थःपिंसं प्रतिवद्ध दु ।’

सम्झौता पती ल्हाःचिं तयेगु ज्याझ्वलय् येँ महानगर सहरी योजना आयोगया उपाध्यक्ष सरोज बस्नेतलिसें वडाअध्यक्ष व कार्यपालिकाया दुजःपिनिगु नं उपस्थिति दुगु खः ।

सम्बन्धित बुखँ

LEAVE YOUR COMMENTS