ख्वपया थाथुचाय् कृष्ण द्यःया देगः शिलान्यास

ख्वप(नेपालभाषा टाइम्स)- ख्वप नगरपालिकाया प्रमुख सुनिल प्रजापतिं सुं विदेशीया ध्यबा छगःतकं ग्वाहालि मकासे ख्वप नगरपालिकां वंगु न्यादँया दुने सछिं मल्याक सम्पदा पुनःनिर्माण व जिर्णोद्वार यानागु खँ कनादीगु दु । वय्कलं वंगु न्यादँया दुने नगरपालिकां विदेशीतय् ग्वाहालि मकासे १२४ गू स्वयां अप्वः सम्पदाया पुनःनिर्माण व जिर्णोद्वार यानागु खँ कनादिसें थुपिं दक्वं ज्या स्थानीय जनतापाखें गठन यानातःगु उपभोक्ता समितिपाखें सम्पन्न जूगु खः धयादिल ।

नगर प्रमुख प्रजापतिं उगु खँ थनया ३ वडास्थित थाथुचाय् कृष्ण द्यःया देगः शिलान्यास ज्याझ्वलय् धयादीगु खः । देगःया शिलान्यास यासें नगर प्रमुख प्रजापतिं उपभोक्ता समितिपाखें ज्या यायेबलय् खर्च म्हो जुइगु जक मखसे गुणस्तरी निर्माण जुइगु नापं स्थानीयया अपनत्व नं दइ धयादिल । वय्कलं थःगु हे स्रोत व साधनया प्रयोग यात धाःसा मौलिक प्रविधिया संरक्षण नं जुइ धासें कृष्ण द्यःया देगः नं उपभोक्ता समितिं इमान्दारीपूर्वक इलय् ज्या सम्पन्न याइगु विश्वास प्वंकादिल ।

ख्वप नगरपालिकां सम्पदा पुनःनिर्माणयात विशेष बः बिया वयाच्वंगु धासें वय्कलं लोप जुइगु अवस्थाय् थ्यनाच्वंगु सांस्कृतिक, धार्मिक व पुरातात्विक सम्पदायात पुनःजीवन बीगु ज्याय् नगरपालिका न्ह्याबलें न्ह्यचिला च्वनी धयादिल ।

ख्वप ३ वडाअध्यक्ष राजकृष्ण गोरां कृष्ण द्यःया देगः प्राप्त प्रमाणया लिधंसाय् मौलिक शैलीइ उपभोक्ता समितिपाखें निर्माण यायेगु जुइ धयादिल ।

ज्याझ्वलय् नेमकिपा ३ वडा इन्चार्ज रामसुनदर खाताखो, वडा सदस्य कृष्णगोपाल चौगुथि, सुनिता अवाल, कृष्ण मन्दिर पुनःनिर्माण उपभोक्ता समिति अध्यक्ष कमलनारायण धुख्वां नं नुगःखँ तयादीगु खः ।