कोथुननि बचे यायेत भूमिमन्त्रीयात ज्ञापन
- नेपालभाषा टाइम्स
- किपा-अर्बिन्द्रमान सिंह
येँ – असंया झिंखुगू शताब्दीया अशोकवृक्ष विहार (कोथुननी) संरक्षण यायेमाःगु माग यासें म्हीग मंगलवाः भूमि व्यवस्था, सहकारी तथा गरिबी निवारण मन्त्री पद्मा अर्यालयात ज्ञापन पौ बिउगु दु । प्रदेश सभाया सांसद जीवनराम श्रेष्ठ व रामवीर मानन्धर सहित वंगु पुचलं मन्त्री अर्यालयात ज्ञापन पौ बिउगु खः । ज्ञापन पौ बीगु झ्वलय् ऐतिहासिक महत्व दुगु विहारयात राज्य हे संरक्षण यायेमाःगु माग याःगु खः ।
ज्ञापन पौ बीगु झ्वलय् ऐतिहासिक कोथुननी थुनाः अन व्यापारिक कम्प्लेक्स दयेकेगु गुथि संस्थानया ज्या दिकेमाःगु खँय् बः बिउगु खः । सम्पदा अभियनता उमेश स्थापित व रविन्द्र श्रेष्ठं मन्त्री अर्यालयात उगु विहार व उकिया पुरातात्विक व ऐतिहासिक महत्वया बारे जानकारी बिउगु खः ।
लिसः बीगु झ्वलय् मन्त्री अर्यालं गुथि संस्थान व सांसदतय्गु उपस्थिति इ थुकिया बारे सहलह यायेगु खँ धयादीगु खः । वय्कलं राज्य सम्पदा संरक्षणया हे पक्षय् दुगु व अध्ययन यानाः माःगु पलाः ल्ह्वनेगु बचं नं मन्त्री अर्यालं बियादीगु खः । गुथि संस्थानं कोथुननी थुनाः अन व्यापारिक कम्प्लेक्स दयेकेगु धकाः ठेकेदार लिसे सम्झौता याःगु खःसा उकियात कयाः सम्पदा अभियन्ता व स्थानीय वासिन्दा धाःसा उगु विहारयात ऐतिहासिक रुपं हे पुनर्निर्माण यायेमाःगु माग याना वयाच्वंगु खः । कोथुननी व्यापारिक कम्प्लेक्स दयेकल धाःसा अनया ऐतिहासिक नष्ट जुइगु धासें विरोध जुया वयाच्वंगु दु ।
थ्वहे झ्वलय् थँबही दयेकाच्वंगु छायाँदेवी कम्प्लेक्सयात कयाः संसदया अन्तर्राष्ट्रिय समितिइ उजुरी तःगु दु । उगु उजुरीयात कयाः समितिं याकनं हे छानवीन यायेगु आश्वासन बिउगु खँ सीदुगु दु । अथे हे छायाँदेवी कम्प्लेक्सयात कयाः युनेस्को नेपाः ज्याकुथी नं उजुरी दर्ता याकूगु दु । युनेस्कोया नेपाः ज्याकुथी न्हापां दर्ता यायेत अस्वीकार याःगु खःसा लिपा उजुरी दर्ता यायेत वंपिं अभियन्ता भागवत नर्सिङ सहितया पुचलं उजुरी दर्ता मयायेगु खःसा थःपिंसं केन्द्रीय ज्याकुथी उजुरी दर्ता यायेगु धकाः ख्याच्वः बीवं उजुरी दर्ता याःगु खँ अभियन्त प्रधानं ‘नेपालभाषा टाइम्स’ यात कनादीगु दु ।
उकथं हे छायाँदेवी कम्प्लेक्सयात कयाः सार्वजनिक लेखा समितिइ नं उजुरी बियागु खँ वय्कलं कनादिल ।
LEAVE YOUR COMMENTS