धमाथूया परम्परागत खः जात्रा क्वचाल

येँ – येँया उत्तरी भेग धमाथुलिइ न्यायेकीगु परम्परागत खः जात्रा क्वचाल । वंगु पाहांचः¥हे बहनीनिसें न्ह्याःगु जात्राया लिपांगु न्हि महांकाःद्यः, गणेद्यःया स्वखः व पीगद्यःया यानाः न्यहम्ह दःया खः जात्रा जूगु खः । जात्राया लिपांगु न्हि गणेद्यः, इन्द्रायणी (अजिमा) व महाकालीया विशेष पूजा याःगु उगु इलय् इन्द्रायणी द्यःयाथाय् जात्रा क्वचायेकेगु झ्वलय् सीबाजं थायेमाःगु चलन दु । ल्हुतिं करिब ४ किलोमिटर उत्तरय् लाःगु धमाथूया थुगु जात्रा लिच्छवीकालीन जुजु धर्मदेवया पालंनिसें चले जूगु धइगु धापू दु । २०७२ बैशाखया तःभुखाचं धमाथूया मुक्कं वस्तीयात प्रभावित यायेवं गामय् सांस्कृति जागरण हयेगु ल्याखं थुगुसी ल्याय्म्ह पुस्तायात बासुरी व धिमय्या प्रशिक्षण बीगु ज्या तकं जूगु खः ।

स्वनिगलय् न्यायेकीगु मेमेगु जात्रा पर्वया तुलनाय् थन न्यायेकीगु जात्रापर्वया खास बांलाक प्रचारप्रसार जुइ मफयाच्वंगु स्थानीय कान्छा महर्जनं धयादी । आर्थिक अभावया कारणं जात्रा संचालनय् तकं समस्या जूगु वय्कःया धापू दु । ‘जात्रा संचालनया निंतिं तारकेश्वर नगरपालिकां आर्थिक ग्वाहालि यानाच्वंगु दु । तर उगु आर्थिक ग्वाहालि नं तसकं म्हों जूगुलिं समस्या जूगु जक मखसे स्थानीयतय्सं असन्तुष्टि तकं प्वंका वयाच्वंगु दु’, वय्कलं धयादी । स्थानीय तहय् आपालं अधिकार वःगु धाःगु न्यना, तर जात्रा संरक्षणया निंतिं खास छुं पहल मजूगु वय्कःया धापू दु ।