सन्दिपयात १२ दँ कैदया माग यासें मुद्दा

येँ (नेपालभाषा टाइम्स)- मिसामचा बलात्कार याःगु द्वपनय् सन्दीप लामिछाने विरुद्ध १२ दँया कैद सजाय माग यासें मुद्दा दर्ता याःगु दु । सरकारी वकिलया ज्याकुथिं म्हिगः येँ जिल्ला अदालतय् मुद्दा दर्ता याःगु खः । लामिछाने विरुद्ध बलात्कार पुष्टि जुइगु माक्व प्रमाण दुगु खँ प्रहरीं धाःगु दु ।

प्रहरीं छवाः न्ह्यः हे अनुसन्धान यानाः सरकारी वकिल यात प्रतिवेदन बिउगु खः । लामिछाने विरुद्धया मुद्दाय् म्हिगःनिसें थुनछेक बहस न्ह्याःगु दु । लामिछानें प्रहरी हिरासत दुने हे थः विरुद्ध लाःगु मुद्दायात कयाः प्रतिवाद यायेगु धायेगु यानाच्वंगु खः ।

प्रहरी सरकारी वकिलयात बिउगु प्रतिवेदनय् फौजदारी अपराध संहिताय् १६ दँ निसें १८ दँया मिसामचायात बलात्कार याइपिंत १० निसे १२ दँ तक कैद जुइगु प्रावधान दुकथं १२ दँया कैद सजाय माग याःगु खः ।

येँया गौशाला च्वंगु छगू होटलया कोठाय् लामिछानें थःत बलात्कार याःगु धासें १७ दँया मिसामचां वंगु २१ भाद्रय् प्रहरीइ उजुरी बिउगु खः । लामिछानें २० असोजय् प्रहरीइ आत्मसमर्पण याःगु खः ।

प्रहरीयात पीडित मिसा व लामिछानें बिउगु बयान थवंथवय् तसकं पाःगु खनेदु । अय्नं प्रहरीं लामिछाने विरुद्ध यक्व प्रमाण दुगु खँ धाःगु दु ।