निर्वाणमूर्ति विहारय् परियत्ति उत्तीर्ण जूपिंत सिरपाः इन

येँ –  निर्वाणमूर्ति विहार बौद्ध परियत्ति शिक्षा केन्द्रय् बौद्ध परियत्ति परीक्षाय् उत्तीर्ण जूपिंत सिरपाः इनेज्या जुल । भिक्षु धर्ममूर्ति महास्थविर मूपाहांकथं बिज्याःगु ज्याझ्वः अनुपमा गुरुमांया सभापतित्वय् जूगु खः । विहारया महासचिव अमृतमान ताम्राकारं लसकुस यानादिसें वय्कलं २०७२ सालंनिसें परियत्ति शिक्षा ब्वंकेगु शुरु जूगु विहारय् थुगुसी स्वक्वःखुसी परियत्ति परीक्षा उत्तीर्ण जूपिंत सिरपाः लःल्हायेगु ज्या जानकारी बियादीगु खः ।

केन्द्रया प्रमुख शिक्षिका सुमना गुरुमांनं म्हो इलय् नं केन्द्रय् परियत्ति ब्वनीपिं विद्यार्थीपिं अप्वया वंगु खँ कनादिसें थुगुसीया परीक्षाय् स्वीनिम्ह परीक्षार्थी उत्तीर्ण जूगु कनाबिज्यात । केन्द्रय् परियत्ति शिक्षा ब्वंकेगु निंतिं व सिरपाःया निंतिं माःगु व्यवस्था व अक्षय कोषया निंतिं चन्दा तयाः ग्वाहालि यानादीपिं दाता शारदा वन्त राजभण्डारी व सानुमैंया तुलाधरपिंत भिक्षु धर्ममूर्ति महास्थविर व डा. धम्म विजया गुरुमांपाखें सम्मानपत्र लःल्हाना बिज्याःगु खः ।

ज्याझ्वलय् नुगःखँ प्वंकेगु झ्वलय् मूपाहां भिक्षु धर्ममूर्तिं बौद्ध परियत्ति शिक्षायात समयानुकूल परिमार्जन यानाः यंकेगु ज्या न्ह्याका च्वनेमाः धयाबिज्यात । केन्द्रया परीक्षार्थीपिं मञ्जुश्री गुरुमां, यशोधरा वज्राचार्य व एलिजा ताम्राकारं परियत्ति शिक्षाया महत्व व थःगु अनुभव कनादीगु ज्याझ्वलय् विहार प्रमुख डा. धम्म विजया गुरुमांनं सुभाय् देछानाबिज्याःगु खःसा ज्याझ्वः सभापति अनुपमा गुरुमांनं ओवाद बियाबिज्याःगु खः ।

सम्बन्धित बुखँ

LEAVE YOUR COMMENTS