नागढुंगाया सुरुंगमार्गय् स्थानीय जनताया पंगः

येँ (नेपालभाषा टाइम्स) – नागढुंगा सुरुङ मार्ग दयेकेगु खँयात कयाः स्थानीय वासिन्दां पंगः थनेगु ख्याच्वः बिउगु दु । आयोजनाया परामर्शदाता ज्याकू न्ह्यःने प्रदर्शन यासें स्थानीय वासिन्दां निन्हुया दुने थःपिनिगु माग पूमवनीगु खःसा सुरुङ मार्ग निर्माणय् अवरोध यायेगु ख्याच्वः बिउगु खः ।

चन्द्रागिरी नगरपालिका वडा नम्बर २ या अध्यक्ष गोपी सुर्खेतीया नेतृत्वय् प्रदर्शन याःगु पुचलं उगु ख्याच्वः बिउगु दु । पुचलं थीथी न्यागू माग नं तःगु दु । थःपिनिगु माग न्ह्यब्वयेगु झ्वलय् उमिसं आयोजना दयेकेगु झ्वलय् जुइगु क्षतिया तत्काल क्षतिपूर्ति जुइमाःगु, परापूर्वकालंनिसें प्राकृतिक रुपय् संरक्षण जुयाच्वंगु त्वनेगु लः न्हापा थें निःशुल्क उपलब्ध याके बी माग याःगु दु ।

उकथं हे स्थानीय वासिन्दायात रोजगारी बीमाःगु, विशेष प्रभावित क्षेत्र घोषणा यायेमाःगु, अज्याःगु प्रभावित थासय् फुटबल मैदान दयेकेमाःगु, सतक निर्माण यायेमाःगु माग नं यानातःगु दु। अथे हे सिँचाइ व्यवस्था जुइमाःगु, सुरुङमार्ग च्वय्या जग्गाया क्षतिपूर्ति बीमाःगु माग तसें थ्व माग पूमवंकल अन धाःसा ज्या याके मबीगु ख्याच्वः उमिसं बिउगु दु ।