एसइइ परीक्षाया लिच्वः साउनय्

येँ – थुगुसीया एसइइ परीक्षाया लिच्वः थ्व हे साउन मसान्तया दुने सार्वजनिक यायेगु तयारी जुयाच्वंगु दु । परीक्षा नियन्त्रण कार्यालयं माध्यमिक शिक्षा परीक्षा (एसइइ)या लिच्वः थ्व हे साउनया दुने सार्वजनिक यायेकथं तयारी यानाच्वंगु दु ।

कार्यालययाकथं थीथी जिल्लापाखें विद्यार्थीतय् मूल्यांकन लिच्वः वयेगु क्रम जारी जुयाच्वंगु दु । क्वःछिनातःगु इलय् दक्वं जिल्लापाखें मूल्यांकन लिच्वः थ्यंक वल धाःसा साउनया अन्तिम तकया दुने लिच्वः सार्वजनिक यायेगु तयारी कार्यालयं याःगु दु ।

परीक्षा नियन्त्रण कार्यालयया १० गू तगिंया परीक्षा नियन्त्रक रुद्रप्रसाद अधिकारीं आतक नं थीथी जिल्लापाखें विद्यार्थीतय् मूल्यांकन लिच्वः वयेगु क्रम जारी हे जुयाच्वंगु धासें थःपिनिगु तयारी नं साउन मसान्तया दुने लिच्वः सार्वजनिक यायेगु कथं हे जुयाच्वंगु धयादिल ।

साउनया न्हापांगु वाःतकया दुने दक्वं जिल्लापाखें मूल्यांकन लिच्वः प्राप्त जुल धाःसा साउनया अन्त्य तकया दुने परीक्षाफल प्रकाशित याये फइगु वय्कःया धापू दु ।

वय्कलं बियादीगु जानकारीकथं आतकया दुने नीन्यागू जिल्लाया एसइइ मूल्यांकन रिपोर्ट वयेधुंकूगु दु । मेमेगु जिल्लाय् निषेधाज्ञा, खुसिबाः, चलःया समस्या नापं गुलिखे जिल्लाया ज्याकूपाखें विद्यालयं छ्वया हःगु मूल्यांकनया लिच्वतय् हे समस्या खने दयाच्वंगुलिं लिच्वः छ्वया हयामच्वंगु नं जानकारी बियादिल।

वंगु जेठ १३ गतेनिसें संचालन यायेगु धयातःगु एसइइ परीक्षा कोरोना भाइरसया निगूगु लहरया संक्रमणया कारणं स्थगित याःगु खः । भौतिक रुपं परीक्षा संचालन याये मफइगु जुइवं परीक्षा बोर्डं आन्तरिक मूल्यांकनपाखें लिच्वः सार्वजनिक यायेत्यंगु खःसा उकिया निंतिं छुं दिं न्ह्यः जक कार्यविधि तकं दयेकूगु खः ।

सम्बन्धित बुखँ

LEAVE YOUR COMMENTS