न्हूदँकुन्हु शंखधर सम्मान लःल्हाइगु
थिमि (नेपालभाषा टाइम्स)- राष्ट्रिय विभूति शंखधर साख्वाः प्रतिष्ठानया ग्वसालय् थुगुसी नेपाल संवत् ११४३ न्हूदँया लसताय् जुइगु ज्याझ्वलय् ‘शंखधर सम्मान’ लःल्हाइगु जूगु दु । प्रतिष्ठानया ग्वसालय् ने.सं. ११४३ कछलाथ्व पारु न्हूदँ कुन्हु थनया शंखधर चोकय् शंखधर साख्वाःया झ्वाताय् मल्यार्पण यायेगु ज्याझ्वलय् उगु सम्मान लःल्हायेत्यंगु खः ।
प्रतिष्ठान नायः ज्ञानराम श्रेष्ठया कथं थुगुसी वंगु खुगू दशक न्ह्यवंनिसें मदिक्क नेपालभाषा साहित्य सम्मेलन ग्वसाः ग्वया वयाच्वंगु विराट नेपालभाषा साहित्य सम्मेलन गुथि (विराट गुथि) व श्यामकृष्ण मानन्धर (थिमि)यात लःल्हायेत्यंगु खः ।
प्रतिष्ठानं वंगु ख्वीछदँ न्ह्यःनिसें नेपाल संवत्, नेपालभाषा आन्दोलनलिसें नेवाः हक अधिकार, जातीय मुक्ति, जनपक्षीय साहित्यकार जन्म बिया वयाच्वंगु विराट गुथियात उगु सम्मान लःल्हायेत्यंगु खः । अथे हे निगू दशक न्ह्यवंनिसें नेपाल संवत्या प्रवर्तक शंखधर साख्वाः व नेपाल संवत्या बारे आपालं अध्ययन, अनुसन्धान यानाः संस्थागत विकासया ज्याय् भूमिका म्हितेगु निसें थाय्थासय् राष्ट्रिय विभूति शंखधर साख्वाःया झ्वाता पलिस्था यायेगु, प्रतिष्ठान गठन यायेगु ज्याय् महत्वपूर्ण योगदान बिउगु धासें मध्यपुर थिमिया श्यामकृष्ण मानन्धरयात ‘शंखधर सम्मान’ लःल्हायेत्यंगु खः ।
प्रतिष्ठानया संस्थापक सचिवलिसें पुलांम्ह नायःतकं जुयादीम्ह मानन्धरं शंखधरया झ्वाता निर्माण, शंखधर चोक नामाकरण, नेपाल संवत् व शंखधरया बारे खोज, अनुसन्धान व प्रचार प्रसारय् क्रियाशील जुयादीगुलिं सम्मान यायेत्यनागु प्रतिष्ठानं जानकारी बिउगु दु ।
अथे हे थुगुसीनिसें नेपाल संवत् बारे सांस्कृतिक, सांगीतिक, साहित्यिक, पत्रकारिता व अनुसन्धान–अन्वेशषण माध्यमं बियादीगु योगदानयात कयाः ‘शंखधर पदक’ नं लःल्हायेगु प्रतिष्ठानं जानकारी बिउगु दु । प्रतिष्ठानयाकथं नेपाल संवत्यात व्यावहारिक रुपं लागू यानादीम्ह येँ महानगरपालिकाया निवर्तमान प्रमुख विद्यासुन्दर शाक्य, यल महानगरपालिकाया प्रमुख चिरिबाबु महर्जन, सांगीतिक ख्यःया पवित्र कसाः, साहित्यपाखे तिलकप्रकाश कायस्थ व संचारकःमि सुगतरत्न सिन्दुराकारयात उगु पदक लःल्हाइगु जूगु दु ।
LEAVE YOUR COMMENTS