मरुसतः बछि ज्या सिधल

येँ देय्या म्हसीका जुयाच्वंगु मरुसतःया पुनःनिर्माण यायेगु ज्याया झ्वलय् आतकया दुने ५० प्रतिशत ज्या क्वचाःगु दु । लक्ष्यकथं हे मरुसतः पुनःनिर्माण यायेगु ज्या जुयाच्वंगुलिं इलय् ज्या सिधइगु काष्ठमण्डप निर्माण समितिं न्ह्यथंगु दु । मरुसतः पुनःनिर्माण अन्तर्गत थौंकन्हय् मुख्य प्यंगः थां तयाः दथुइ स्वायेगु ज्या क्वचायेधुंकूगु समितिया अध्यक्ष लिसें प्रदेश नं. ३ या सांसद राजेश शाक्यं कनादिल ।

मरुसतः निर्माण यायेगु ज्याय् थौंकन्हय् स्वीम्ह ज्यामितय्सं नियमित रुपय् ज्या याना वयाच्वंगु दु । शुरुया दिनय् मरुसतः निर्माणया निंतिं सिँ, अप्पा लगायत निर्माण सामग्री इलय् उपलब्ध याके मफुगुलिं छुं ई लिबाः वंगु खःसां आः अज्याःगु अवस्था मदुगु व वइगु दिनय् नं छुं समस्या मवइगु अध्यक्ष शाक्यं धयादिल ।

वि.सं. २०७२ सालया भुखाचं पाःताः जुइक दुना वःगु ऐतिहासिक मरुसतः पुनःनिर्माणया निंतिं थगुने बैशाख ३१ गते छगू क्षमा पुजा यानाः पुनःनिर्माणया ज्या न्ह्याकूगु खः । वयां लिपा थगुने कात्तिकय् शुभारम्भ पुजा यानाः विधिवत रुपय् उगु ऐतिहासिक रुपं महत्वपूर्ण सम्पदाया पुनःनिर्माणया ज्या शुरु याःगु खः ।

मरुसतः पुनःनिर्माणया ज्या स्वदँया दुने क्वचायेकेगु लक्ष्ययालिसें ज्या न्ह्यानाच्वंगु दुसा पुनःनिर्माणया ज्यां नं उकथं हे गति कयाच्वंगु दु ।
क्वःछिनातःगु इलय् हे पुनःनिर्माणया ज्या क्वचायेकेगु ल्याखं न्ह्य्गूगु शताब्दीया मरुसतः पुनःनिर्माणया ज्या जुयाच्वंगु दु । नेपाः देय्या राजधानीया नां येँ (काठमाडौं) धकाः थ्व हे मरुसतः (काष्ठमण्डप) पाखें च्वं वंगु खः धइगु इतिहासय् न्ह्यथनातःगु दु ।

थगुने बैशाख ३१ गते छगू क्षमा पुजा यानाः पुनःनिर्माणया ज्या न्ह्याकूगु खः । वयां लिपा थगुने कात्तिकय् शुभारम्भ पुजा यानाः विधिवत रुपय् उगु ऐतिहासिक रुपं महत्वपूर्ण सम्पदाया पुनःनिर्माणया ज्या शुरु याःगु खः ।

मरुसतः पुनःनिर्माणय् छ्यःगु प्यंगः थांमध्ये स्वंगः न्हूगु खःसा छगः थां धाःसा पुलांगु हे छ्यलागु समितिं जानकारी बिउगु दु । बिसेत नांया छम्ह मनुखं कल्पतरुयात म्हसीका उकियात नियन्त्रणय् कयाः छमा सिमा उपलब्ध याकेगु बचं ल्हाकाः त्वःता बीवं कल्पतरुं सिँ उपलब्ध याकूगु व न्हय्गूगु शताब्दीइ जुजु सिद्धिनरसिंह मल्लं उकियापाखें हे मरुसतःया दयेकूगु व लिपा उकियात हे ‘काष्ठमण्डप’ धायेगु याना हःगु खः ।

पुनःनिर्माण समितिया अध्यक्ष शाक्यं धयादिल, ‘२०७६ सालया असार मसान्ततकया दुने छेँदिया ज्या क्वचायेकेगु लक्ष्य दुगु खः, व हे कथं ज्या न्ह्याः वनाच्वंगु दु । उकिं क्वःछिनातःगु इलय् हे ज्या क्वचाइ धइगु खँय् छुं आशंका यानाच्वनेमाःगु मदु ।’थुगु ऐतिहासिक सम्पदा पुनःनिर्माणया निंतिं १९ गू करोड खर्च जुइगु अनुमान यानातःगुलिइ येँ महानगरपालिकां पुनःनिर्माण समितियात न्यागू करोड न्यय्गू लाख ग्वाहालि यायेधुंकूगु दु ।

मनपां बिउगु थ्व हे ग्वाहालिं समितिं पुनःनिर्माणया ज्या न्ह्याकूगु खः । मरुसतः पुनःनिर्माणय् पुलांगु प्रयोग याये जित्तलेया सिँ प्रयोग यानाः न्हूगु आवश्यक जूगु सिँ टिम्बर कर्पोरेशन अफ नेपाललिसे लिखित सम्झौता यानाः हयेगु यानाच्वंगु दु ।