च्वसु च्वज्या स्यनेकने मुँज्या

येँ- हलिं नेवाः गुथि वनस्पति अनुसन्धान कचाया ग्वसालय् जूगु नेपालभाषा च्वसु च्वज्या स्यनेकने मुँज्या क्वचाल । उगु मुँज्या वंगु साउन २६ गते जूम अनलाइनया माध्यमं जूगु खः ।

ग्वसाः खलःया कजि प्रा. डा. धर्मराज डंगोलंं लसकुस यासें मुँज्याय् सहभागि जुयादीपिंपाखें वनस्पति सम्बन्धी च्वसु च्वकाः सफू पिथनेगु ग्वसाः यानाच्वनागु जानकारी बियादिल । वय्कलं थुगु ज्याझ्वः ताःलाकेगु उद्देश्यं हे थुकथंया प्रशिक्षणया ज्याझ्वः न्ह्याका खः धयादिल ।

थौंकन्हय् अमेरिकाय् च्वँच्वनादीम्ह लोककवि राजभाई जकःमिं बियादीगु प्रशिक्षणय् नेपाःलिसें अमेरिका, क्यानाडा, बेलायतया स्वीप्यम्हेसिनं ब्वति कयादीगु खः । प्रशिक्षक जकःमिं च्वसु च्वयेबलय् उकी दयेमाःगु कलाया तत्व, अंग, ताजि, तातुना आदि विषययात कःघानाः प्रशिक्षणय् बियादीगु खःसा गुकथं नेपालभाषां शुद्ध च्वयेगु धइगु बारे नं प्रशिक्षण बियादीगु खः ।

प्रशिक्षणय् सहभागि प्रा. डा. श्यामकृष्ण महर्जन, डा. अनिता मानन्धर, डा. शान्तवीरसिंह तुलाधर, प्रा. डा. धर्मराज महर्जन, दामोदर प्रधान, पन्नारत्न महर्जन, वीरबहादुर महर्जन, मय्जु रोज श्रेष्ठ, सिलकुमारी महर्जनपिंसं प्रशिक्षणया मूल्यांकन यानादिसें थुकथंया प्रशिक्षणं थःपिंत नेपालभाषां च्वयेत उत्प्रेरणा बिउगु खँ कनादीगु खः । लिसें थुकथंया प्रशिक्षण ज्याझ्वः प्रभावकारी जूगु विचाः नं वय्कःपिंसं प्वंकादीगु खः । ज्याझ्वलय् गुथिया मूछ्याञ्जे सुरेश सैंजूं सुधाय् देछानादीगु खः ।