यलय् नं नेवाः पाठ्यसफू तयार
यल (नेपालभाषा टाइम्स)- यल महानगरपालिका अन्तर्गत लाःगु स्कुलय् स्थानीय पाठ्यक्रम कथं नेपालभाषा ब्वंकेगु निंतिं पाठ्यसफू तयार जूगु दु । थ्व पाठ्य सफू वंगु शुक्रवाः यल मनपाया मेयर चिरिबाबु महर्जनयात लःल्हाःगु दु । पाठ्यसफू निर्माण समितिया संयोजक उपप्रा. तुलसीलाल सिंह शुक्रवाः मेयर महर्जनयात पाठ्यसफू लःल्हानादीगु खः ।
पाठ्यसफू लःल्हाना कयादिसें मेयर महर्जनं थ्वहे वइगु शैक्षिक सत्रंनिसें यल मनपा अन्तर्गतया सामुदायिक व निजी फुक्कं स्कुलय् ब्वंकेगु सुरु यायेगु खँ कनादिल । वय्कलं पाठ्यसफू तुरुन्त छापे यायेत नं महानगरया शिक्षा महाशाखायात निर्देशन बियादिल ।
मेयर महर्जनं यल देय्या सभ्यता, थनया जात्रापर्व, संस्कृति रहनसहन, थाय्बाय्, थनया वैभवयात थुइकेत नेपालभाषा तसकं आवश्यक जूगु धासें नेपालभाषा मथुइकं थनया वैभव थुइकेमफइगु जूगुलिं विद्यार्थीतय्त मचांनिसें हे यल देय्या वैभवय् गौरव याये फयेकेत नेपालभाषाया माध्यमं स्थानीय पाठ्यसफू तयार यानागु खँ कनादिल ।
यल मनपाया प्रवक्ता व सामाजिक विकासया संयोजक लिसें वडा ९ या अध्यक्ष राजु महर्जनं थुगु पाठ्यसफू याकनं हे शिक्षा समितिपाखें पारित यानाः छापे यायेगु खँ कनादिल । वय्कलं थुगु विषय ब्वंकेत शिक्षक नियुक्त यायेगु निंतिं याकनं हे विज्ञापन यायेगु खँ नं कनादिल । वय्कःया कथं मनपा अन्तर्गतया सामुदायिक स्कुलय् थ्व विषय ब्वंकेत पीम्ह शिक्षक नियुक्त यायेगु महानगरपालिकाया तयारी दु ।
नेपालभाषा पाठ्यसफू उपप्राध्या–पक महर्जनया संयोजकत्वय् दुगु सविना महर्जन, एलिना महर्जन, दिपक तुलाधर व जीवन महर्जन पाठ्यसफू निर्माण समितिं तयार याःगु खः । उपप्राध्यापक महर्जनं मस्तय्त तसकं सहज ढंगं अध्यापन याकेफइ कथं पाठ्यसफू तयार यानागु खँ धयादीगु दु ।
सफू लःल्हायेगु झ्वलय् समितिया दुजः दिपक तुलाधरं पाठ्यसफू लागू यायेधुंकाः फुक्क स्कुलय् पाठ्यक्रम लागू याः–मयाः स्वयेगु निंतिं निरन्तर अनुगमन याना च्वनेमाःगु खँ धयादिल । वय्कलं थुकिया निंतिं छगू अनुगमन व सहजीकरण पुचः हे नीस्वनाः ज्या यायेमाःगु सुझाव नं तयादीगु खः ।
यलय् बालविकास तह निसें ३ तगिं तक स्थानीय पाठ्यक्रम नेपालभाषां ब्वंकेत्यंगु खः । थुकियात बुलुहुँ च्वय्या कक्षाय् नं लागू यानाः च्यागू तगिं तक हे ब्वंकेगु महानगरपालिकाया ग्वसाः दु ।
LEAVE YOUR COMMENTS