जनजाति न्ह्यलुवा डा. ओम गुरुङ मंत
येँ (नेपालभाषा टाइम्स)÷आदिवासी जनजाति आन्दोलनया न्ह्यलुवा लिसें मानव–शास्त्र विषयया नांजाःम्ह प्राध्यापक डा. ओम गुरुङ म्हिगः आकाझाकां मंत । वय्कः वंगु छुं ई न्ह्यवंनिसें जलस्येँ (किड्नी) या ल्वचं कयाः वासः याकाच्वनादीम्ह खः ।
उपचारया झ्वलय् वय्कःया जलस्येँ प्रत्यारोपणया ज्या नं जूगु खः । तर प्रत्यारोपण याःगु जलस्येँय् हे क्यान्सर नं खने दयेवं वय्कः क्यान्सरया वासः याकाच्वनादीम्ह खः । म्हिगः वय्कः येँया क्यान्सर अस्पतालय् हे मदुगु खँ वय्कःया छेँजःपिंसं धाःगु दु ।
मदुम्ह डा. गुरुङ ६९ दँ दुम्ह खः । वय्कः नेपाल आदिवासी जनजाति महासंघय् सन् २००१ निसें २००४ तक महासचिव जुयाः नेतृत्व यानादीगु खःसा वयां लिपा महासंघया सल्लाहकार जुयाः ज्या यानादीगु खः ।
अथे हे वय्कः त्रिविविइ मानवशास्त्रया प्राध्यापक नं खः । वय्कलं त्रिविविइ ३६ दँ ब्वंकादीगु खःसा १२ दँ मानवशास्त्र केन्द्रीय विभागया प्रमुख जुयादीगु खः । त्रिविविइ मानवशास्त्र व समाजशास्त्र विभाग पलिस्था याकेगु ज्याय् नं वय्कःया मू भूमिका दुगु खः ।
वय्कः पद्मरत्न तुलाधर स्मृति प्रतिष्ठानया सदस्य सचिव नं खः । डा. गुरुङया जनजाति व मानवशास्त्रलिसे सम्बन्धित आपालं च्वसु व कार्यपत्रत पिहां वयाच्वंगु दु । मदुम्ह गुरुङया जहानया लिसें निम्ह म्ह्याय् व छम्ह काय दी ।
LEAVE YOUR COMMENTS