मेलम्चीया लः वइगु अझं अनिश्चित
येँ (नेपालभाषा टाइम्स)÷मेलम्ची खानेपानी आयोजनाया लः स्वनिगलय् वइगु हानं अनिश्चित जूगु दु । खुसिबालं क्षति जूगु मेलम्ची पुनःनिर्माणबारे छुं निर्णय मजूगु व थुकिं याःगु क्षतिया विस्तृत अध्ययन नं जुइ मफुगुलिं आः
मेलम्चीया लः छ्वयाहयेगु खँ अनिश्चित जूवंगु खँ आयोजनाया सूचना अधिकृत राजेन्द्रप्रसाद पन्तं कनादीगु दु ।
वा वये न्ह्यः हे बन्द याःगु सुरुङ वा वये क्वचायेवं हानं शुरु यायेगु ग्वसाः दुगु खः । वंगु साउन २८ व २९ गते वःगु खुसिबालं पहुँच मार्ग नं चुइकूगुलिं हेडवर्क तक वनाः ज्या यायेफइगु अवस्था मदुगु खँ धाःगु दु ।
वय्कःया कथं आयोजनाया १ नम्बर व ९ नम्बर गेट चलखं ल्हानाच्वंगु दुसा हेडवर्क डाइभर्सन सुरुङ दुने नं फि दुहां वंगु अनुमान दु । सरकारं तत्काल अस्थायी रुपं मेलम्चीया लः स्वनिगलय् हयेगु खःसां नं उकिया लागिं गुकथं ज्या यायेगु धकाः निर्णय जुइ मफुनि ।
आयोजनाया कथं आः तक नं स्थलगत रुपं क्षति जूगु थासय् वनाः स्वये फयाच्वंगु मदुनि । आयोजनां ड्रोनया ग्वाहालिं १ व ९ नम्बर गेट ल्हानाच्वंगु खंकूगु खः । संरचना ल्हानाच्वंगुलिं यानाः गुलि क्षति जुल धकाः आः तक अनुमान तकं यायेमफयाच्वंगु खँ नं आयोजनां धाःगु दु ।
LEAVE YOUR COMMENTS