वाङमय शताब्दी पुरुष सत्यमोहन जोशीया निधन
येँ ÷ वाङमय शताब्दीपुरुष सत्यमोहन जोशी थौं आइतवाः सुथय् मंत । वय्कः १०३ दँया वैंसय् मदुगु खः । यलया ग्वार्कोय् च्वंगु किष्ट अस्पतालय् वय्कःयात वासः याकातःगु खःसा अन वासः याकुयाकुं हे थौं सुथय् ७ बजे जुयाः ९ मिनेटय् वय्कः मदुगु खः ।
वय्कः म्हिगः बहनीनिसें तच्वः जुया वःगु खँ अस्पतालं धाःगु खः । अस्पतालया आईसीयु कक्षय् वासः याकातःम्ह वय्कःयात म्हिगःनिसें छेँजःपिंत तकं नापलाके मबिसे तयातःगु खः ।
वय्कःया पारिवारिक दुजः मय्जु देवकी श्रेष्ठं कनादीकथं म्हिगः अस्पतालं वय्कःया स्वास्थ्य ‘क्रिटिकिल’ धकाः जानकारी बिउगु खः ।
अस्पतालं धाः कथं वय्कःयात डेंगू जूगु खःसा वयां लिपा निमोनिया व पिसाब इन्फेक्सन नं जुयाः स्वास्थ्य अवस्था झन् जटिल जुया वंगु खः ।
वय्कः मदुगु खबर वयेवं किष्ट अस्पताल पिने छेँजःपिंलिसें साहित्यिक सांस्कृतिक मनूत मुनेगु शुरु जुइधुंकूगु दु ।
LEAVE YOUR COMMENTS