पप्पुं दयेकूगु कालिमाटी–टेकू ताँ बन्द

येँ – येँया टेकु व कालिमाटी स्वायेगु कथं दयेकूगु ताँ तयार जुइधुंकाः सडक विभागं बन्द याना बिउगु दु । ठेकेदार कम्पनी पप्पु कन्स्ट्रक्सनं दयेकूगु उगु ताँ आः ज्या क्वचायेके धुंकूगु खःसां विभागं सडक मापदण्ड अःखः दयेकूगु धासें उगु ताँय् सवारी साधन चले मयाकेत ट्राफिक प्रहरीयात पौ छ्वयेधुनागु खँ धाःगु दु ।

ताँ दयेकेगु ज्या क्वचायेवं ट्राफिक प्रहरीं उगु ताँय् सवारी साधन चले याके बिउगु खःसा विभागं मापदण्ड अःखः जक मखुसें ताँ दयेकेत छ्यःगु डण्डी तकं गुणस्तरहीन जूगु धासें तत्काल उगु ताँय् सवारी साधन चले यायेगु ज्या बन्द याकि धकाः ट्राफिक प्रहरीयात इनाप याःगु खः । ट्राफिक प्रहरीयात पौ च्वयेधुंकाः उगु लागाय् सवारी साधन चले यायेगु ज्या बन्द यानातःगु दु ।

उगु ताँय् सवारी साधन चले याकेबलय् गुगुं नं इलय् दुर्घटना जुइफइ धासें सवारी साधन चले यायेगु बन्द याःगु खः । ताँ दयेकाच्वंगु इलय् हे सतक विभागया इन्जिनियरतय्सं ताँ दयेकेगु ज्या मापदण्ड अःखः जूगुलिं तत्काल निर्माण ज्या दिकाः ताँ थुना छ्व धकाः निर्देशन बिउगु खःसां कन्स्ट्रक्सनं उगु निर्देशनयात वेवास्ता यासें ताँ दयेकेगु ज्यायात निरन्तरता बिउगु खः ।

दयेकेधुंकूगु ताँ थुना छ्व धायेधुंकाः आः थुकी नं दथुइ ध्यबा नयाः ताँ हानं चालु याकीगु खः लाकि धकाः स्थानीय जनतां शंका याना हःगु दु । पप्पु कन्स्ट्रक्सन आः कारवाहीलय् दु ।