विधेयक पारित जूसा संस्कृति ध्वस्त
- नेपालभाषा टाइम्स
- किपा-गुथि विधेयक विरुद्ध साेमवाः वंघलय् जूगु विराेध सभा
येँ – ‘नेपाःया अमूर्त सम्पदा ल्यंकेमाः धकाः छक्वः युनेस्को छगू पुचः नेपाः वयाः वाङ्मय शताब्दी पुरुष सत्यमोहन जोशीयात नापलाःगु खः । युनेस्कोया प्रतिनिधि वःगु इलय् यलय् बुंगद्यःया जात्रा जुयाच्वंगु खः ।
अले बुंगद्यःया जात्राया व्यवस्थापन स्वयेधुंकाः नेपाःया अमूर्त सम्पदा गथे यानाः व्यवस्थापन यायेमाः धकाः वःपिं प्रतिनिधि थःपिंसं नेपाःया नेवाःतय्त स्यनेमाःगु मखु बरु थःपिंसं नेपाःपाखें सयेका कायेमाः धकाः लिहां वन’ म्हिगः येँया नेपाः बैंक्वेटय् नेवाः राष्ट्रिय परिषद व संघीय समाजवादी नेवाः संघं मंकाः कथं ग्वसाः ग्वःगु ज्याझ्वलय् न्ववायेगु झ्वलय् शिक्षाविद् लिसें प्राध्यापक केदारभक्त माथेमां उगु खँ कनादीगु खः ।
वय्कलं युनेस्को अमूर्त सम्पदायात सन् १९८२ निसें सुचीकृत यायेगु शुरु याःगु धासें नेपाःया गुथि परम्परायात उकिं दुथ्याकेगु कुतः मयाःगु दुःख खँ खः धयादिल । वय्कलं युनेस्कोय् चीनं ३९ गू अमूर्त सम्पदा, भारतं १३, पाकिस्तान व बंगलादेशं न्यागू अमूर्त सम्पदायात सूचीकृत याःगु जानकारी नं बियादिसें धयादिल, ‘नेपाल सरकारं आः तक नं गुथिं थेंज्याःगु अमूर्त सम्पदायात सूचीकृत यायेगु कुतः याःगु मदुनि ।’
सरकारं आः प्रस्ताविक गुथि सम्बन्धी विधेयकं नेपाःया गुथि परम्परायात हे मदयेकेगु कुतः याःगु धासें झिंन्यासःदँ निसें न्ह्याना वयाच्वंगु परम्परायात नष्ट यायेगु धइगु नेपाःया अस्तित्वयात हे नष्ट यायेत स्वःगु द्वपं नं बियादिल । अथे हे सांसद राजेन्द्र श्रेष्ठं सरकारं सदनय हःगु विधेयक संविधानया अःखः जूगु धासें उकियात तत्काल खारेज यायेमाः धयादिल ।
संस्कृति मन्त्रालय अन्तर्गत लाःगु गुथिया विधेयक भूमि व्यवस्था, सहकारी तथा गरिबी निवारण मन्त्रालयं संघीय संसदय् हःगु धासें उकियात तत्काल खारेज यायेमाः धयादिल । उकथं हे ज्याझ्वलय् थःगु प्रतिवेदन न्ह्यब्वयेगु झ्वलय् गुथि संस्थानया पुलांम्ह अध्यक्ष लिसें प्रमुख प्रशासक पञ्चलाल महर्जनं विधेयकया थीथी दफां नेवाःतय् गुथियात जक मखु गुथिया फुक्कं गुथियात सिधयेकीगु खँ कनादिल ।
वय्कलं गुथिया जग्गा रैकर जुइधुंकाः गुथिया नामय् नीस्वनातःगु थीथी कोष सम्बन्धित गुथियात हे बीमाः धासें अथे जुल धाःसा गुथिया परम्परा जक ल्यनीगु मखुसें उकिया आम्दानीं थःपिनिगु संस्कृति चले यायेत नं अःपुइगु खँ कनादिल । वय्कलं धयादी, ‘कोषय् दुगु ब्याजया ७५ प्रतिशत सम्बन्धित गुथिपाखें खर्च यायेगु प्रावधान दु, तर गुथि संस्थानं फुक्क कोषया ध्यबा छथाय् तयाः गुथियारतय्त बियाच्वंगु दु ।
यदि सम्बन्धित गुथियात उगु ७५ प्रतिशत वनीगु खःसा गुथि संस्थानया कर्मचारीपिंसं नयाच्वंगु ध्यबा बचे जुइ, सम्बन्धित गुथियात कोषया ७५ प्रतिशत वनीगु खःसा आः बियाच्वंगु ध्यबा स्वयां सछिदुगं अप्वइ ।’
मेम्ह वक्ता नरेशवीर शाक्यं गुथि विधेयकयात कयाः आः जुयाच्वंगु आन्दोलन प्रतिपक्षी राजनीतिक पार्टीं यानाच्वंगु धकाः हल्ला न्यंकाच्वंगु धासें उगु हल्लायात खण्डन यानाः आन्दोलन यायेमाःगु खँ धयादिल । संघीय समाजवादी नेवाः संघया अध्यक्ष सत्यनारायण महर्जनया सभापतित्वय् न्ह्याःगु ज्याझ्वलय् समाजवादी नेपाःया नेतृ हिसिला यमिं नं न्ववानादीगु खः ।
LEAVE YOUR COMMENTS