नेकपाय् नाटकीय सहमति : संसद मसःतेगु, अध्यादेश लित कायेगु, केन्द्रीय बैठक च्वनेगु

येँ (नेपालभाषा टाइम्स) – सत्तारुढ दल नेकपा दुने ब्वलंगु चरम विवाद समाधान यायेगु लागिं म्हिगः नाटकीय ढंगं सहमति कायम जूगु दु । प्रधानमन्त्री केपी ओलीं म्हीग जारी याःगु अध्यादेश लित कायेगु व मेखे तुरुन्त संसदीय बैठक सःतेमाल धकाः शुरु जूगु हस्ताक्षर अभियान दिकेगु सहमति म्हिगः जूगु खः ।

म्हिगः पार्टीया निम्ह नेतात प्रम केपी ओली व पुष्पकमल दाहाल दथुइ निम्ह जक च्वनाः खँल्हाबल्हा यासें ४ बुँदे सहमति याःगु खः । निम्ह नेतां वयां लिपा स्थायी समितिया बैठक सःतूगु खःसा उगु बैठकय् प्रम ओली नं सहभागी जुयादीगु खः । आः स्थायी समितिया बैठक पुस ५ गते च्वनेगु वयां तुरुन्त लिपा पुस १० केन्द्रीय कमिटीया हे बैठक च्वनेगु समेत निर्णय जूगु खः ।

नेतातय् दथुइ वालुवाटारय् सहमति कायम जुयाच्वंगु इलय् मेखे नेकपाया ८३ म्ह सांसदया हस्ताक्षर ज्वनाः नेता भीम रावल राष्ट्रपति निवास वनाच्वंगु खः । तुरुन्त संसद अधिवेशन सःतेमाल धइगु माग यासें वय्कःपिं थःपिनि निवेदन बीत शितल निवास वंगु खः । तर अनया सचिव बेपत्ता जुयाः निवेदन धाःसा दर्ता तकं मयात ।

सहमति कथं संवैधानिक परिषद् सम्बन्धी व्यवस्था संशोधन यायेत जारी याःगु अध्यादेश लित काइगु जूगुलिं थुकिं ब्वलंकूगु विवाद आः तच्वः मजुइगु आशा याःगु दु। अध्यादेश लिपा म्हीग परिषद्या स्वम्ह जक दुजःत च्वनाः याःगु निर्णय धाःसा आः तक सार्वजनिक मयाःनि ।

सम्बन्धित बुखँ

LEAVE YOUR COMMENTS