लुँ तोलां च्यासः थहां वन

येँ (नेपालभाषा टाइम्स)- नेपाःया लुँ वहः बजारय् म्हिगः लुँ तोलां च्यासः तका थहां वनाः १ लाख १२ हजार ५०० तका कायम जूगु खः । वंगु छुं न्हि न्ह्यवंनिसें अन्तर्राष्ट्रिय लुँ वहः बजारय् भाः थहां कुहां जुयाच्वंगु दु ।

अमेरिकी रोजगारी म्हो जुइवं लगानीकर्तातय्सं लुँइ लगानी यायेवं म्हिगः लुँया भाः थहां वंगु खँ नेपाल सुनचाँदी व्यवसायी महासंघया अध्यक्ष लिसें बजाः विश्लेषक तेजरत्न शाक्यं ‘नेपालभाषा टाइम्स’ यात कनादीगु दु ।

वय्कःया कथं अमेरिकाया लेबर डिपार्टमेन्टं पिकाःगु रिपोर्टय् बेरोजगारी अप्वइगु खँ वयेवं मेगु थासय् लगानी याइपिंसंं नं लुँइ लगानी याःगुलिं लुँया भाः थहां वंगु खः ।

उकथं हे अन्तर्राष्ट्रिय रुपं अमेरिकी डलर कमजोर जूगुलिं उकिया लिच्वः नं लुँया बजारय् लाःगु खँ वय्कलं कनादीगु दु । वंगु छुं न्ह्यः अमेरिकाया रियल स्टेट व्यवसाय थहां वंगु खःसा उकिया कारणं यानाः लुँया भाः कुहां वंगु खः । तर आः वयाः रियल स्टेट व्यवसायय् नं मन्दी वःगुलिं रियल स्टेट व्यवसायय् लगानी याइपिंसं नं लुँइ लगानी यायेवं लुँया भाः थहां वंगु खः ।