
येँ(नेपालभाषा टाइम्स)÷ विश्व स्वास्थ्य संगठन (डब्लुएओं) भारतं उत्पादन याःगु थीथी ब्रान्डया प्यंगू मुसु ल्वय् सम्बन्धी वासः (कफ सिरप) वासः सेवन मयायेत सुझाव बिउगु दु ।
डब्लुएचओं कफ सिरप वासलं स्वास्थ्यय् गम्भिरकथंया लिच्वः लाकाच्वंगु व उकिं मस्तय् मृत्युतकं जुइफुगु धासें भारतं उत्पादन याःगु प्यंगू ब्रान्डया वासः सेवन मयायेत सुझाव बिउगु खः ।
भारतं उत्पादन याःगु कोफ्याक्समेलिन बेबी सिरप, प्रोम्याथेजाइन ओरल सोलुसन, मेकअफ बेबी कफ सिरफ, व मेगरिप एन कोल्ड सिरप नांया प्यंगू ब्रान्डया वासः प्रयोग मयायेत डब्लुएचओं सुुझाव बिउगु खः ।
भारतीय उत्पादन थुपिं प्यंगू ब्रान्डया वासःया प्रयोगं पश्चिमी अफ्रिकी राष्ट्र गाम्बियाय् ६६ म्ह मस्त सीगु अनुमान डब्लुएचओं याःगु दु । संगठनया प्रमुख डा. टेड्रोस एडहोनम ग्रेब्रेसियसं नच्चापिं इपिं मस्तय् मृत्यु इमिगु छेँया निंतिं तसकं हृदय विदारक जूगु नं धाःगु दु ।
मेखे औषधि व्यवस्था विभागं डब्लुएचओं प्रयोग मयायेत सुझाव बिउगु उगु वासः आतक नेपालय् दर्ता मजूनिगु व विक्री वितरण नं मजूनिगु स्पष्ट याःगु दु ।
LEAVE YOUR COMMENTS