
येँ (नेपालभाषा टाइम्स)÷भ्रष्टाचार, फौजदारी कसुर व नैतिक पतन खनेदइगु कसुरय् मुद्दा फयाच्वंपिं फुक्क हे उम्मेदवारतय् उम्मेदवारी खारेज जुइमाः धइगु माग यासें सर्वोच्च अदालतय् रिट दर्ता जूगु दु । कांग्रेस नेता विजयकुमार गच्छदारसहितया नेतातय् उम्मेदवारी खारेज जुइमाः धइगु माग यासें म्हिगः सर्वोच्च अदालतय् रिट दर्ता याःगु खः ।
अधिवक्ता अनिल आचार्यं म्हिगः प्रतिनिधिसभा व प्रदेशसभाया ११ म्ह उम्मेदवार लिसें निर्वाचन आयोग, प्रधानमन्त्री तथा मन्त्रिपरिषद्या ज्याकू अले कानुन मन्त्रालययात विपक्षी दयेकाः रिट तयादीगु खः ।
रिटय् गच्छदार लिसें कांग्रेसया पुलांम्ह नेता गोविन्दराज जोशी, राप्रपाया विक्रम पाण्डे, स्वतन्त्र उम्मेदवार प्रभु साह, स्वतन्त्र उम्मेदवार सरिता गिरी, सिन्धुपाल्चोक १ (क) या एमाले उम्मेदवार युद्धविक्रम तामाङ, मनाङया कांग्रेस उम्मेदवार टेकबहादुर गुरुङ, महोत्तरीया लक्ष्मी महतो, झापा ५ (ख) या माओवादी उम्मेदवार रेवतराज पुरीपिनि उम्मेदवारी खारेजीया माग यानातःगु दु खः । थ्व उम्मेदवारत निष्कलंक मजूगु, भ्रष्टाचार व फौजदारी कसुरय् मुद्दा लानाच्वंपिं व सजाय फयेधुंकूगु जूगुलिं उमिगु उम्मेदवारी खारेज यायेमाः धकाः माग रिटय् यानातःगु दु ।
थुगु रिटयात कयाः वइगु असोज ३० गते प्रारम्भिक सुनुवाइ जुइकथं पेशी क्वःछिउगु दु । उमिगु उम्मेदवारीं भविष्यय् देश व जनताया नितिं अपूरणीय क्षति जुइगु धासें अन्तरिम आदेशं उम्मेदवारी रद्द यायेत व भविष्यय् थज्याःपिं मनूतय्त उम्मेदवार जुइ मदइ कथं कानुन संशोधन यायेत नं माग यानातःगु दु ।
LEAVE YOUR COMMENTS