येँ मनपा व सामुदायिक विद्यालय दथुइ आविष्कार क्लब ज्याझ्वः संचालन सम्झौता

येँ (नेपालभाषा टाइम्स) – येँ महानगरपालिकां महानगर क्षेत्र दुनेया सामुदायिक विद्यालयय् आविष्कार क्लब (स्टीम क्लब) ज्याझ्वः संचालन याइगु जूगु दु। महानगरपालिकां थःगु क्षेत्र दुनेया नीन्यागू सामुदायिक विद्यालयय् विज्ञान, प्रविधि, इन्जिनियरिब, मानविकी, गणित शिक्षाया प्रवद्र्धन यायेगु ल्याखं उगु ज्याझ्वः संचालन यायेत्यंगु खः । उगु आविष्कार क्लब (स्टीम क्लब) संचालनया निंतिं येँ मनपा सहरी योजना आयोगं छनोट याःगु नीन्यागू विद्यालययलिसे सम्झौता नं यायेधुंकूगु दु ।

महानगर प्रमुख विद्यासुन्दर शाक्यं वंगु विहीवाः राष्ट्रिय सभागृहय् जूगु छगू ज्याझ्वःया दथुइ छनोट जूगु विद्यालयया प्रधानाध्यापकयात सम्झौतापत्र लःल्हानादीगु खः । सम्झौता वापत प्रत्येक विद्यालययात छगू लाख तका अनुदान बी । सम्झौता पत्र लःल्हाःगु दिंकुन्हु प्रमुख प्रशासकीय अधिकृत राजेश्वर ज्ञवालीं सम्झौता वापतया ८५ प्रतिशत दांया चेक नं लःल्हानादीगु खः ।

न्हूगु सोचलिसें हयागु थुगु ज्याझ्वःयात व्यावहारिक रुपय् लागू यायेत विद्यालययात इनाप यानादिसें येँ मनपा प्रमुख शाक्यं धयादिल, ‘स्वास्थ्य व शिक्षाया ख्यलय् लगानी अप्वयेकगु झ्वलय् न्हूगु सोचलिसें महानगरं थुगु ज्याझ्वः हःगु खः । थुकियात व्यवहारिक रुपं लागू यायेत निंतिं छिकपिंसं कुतः यानादिसँ ।’

थुकिया लिच्वःपाखें सामुदायिक विद्यालयय् अभिभावक व विद्यार्थीया आकर्षण अप्वइगु विश्वास प्वंकादिसें वय्कलं न्हूगु सामदायिक विद्यालय स्थापना यायेगु माग वयेमाः धयादिल । लिसें वय्कलं सामुदायिक विद्यालय विद्यार्थी म्हो, निजी विद्यालयय् जक विद्यार्थीया चाप अप्वः धकाः चिउताः क्यनाच्वनेगु मखसे गुणस्तरीय शिक्षाया निंतिं योगदान बियाः सामुदायिक विद्यालयय् विद्यार्थी अप्वयेकेगुपाखे ध्यान केन्द्रीत यायेत नं इनाप यानादिल ।

आयोगया उपाध्यक्ष सरोज बस्नेतं थुगु ज्याझ्वलय् न्यागूनिसें गुंगू तगिंतकया विद्यार्थी सहभागि जुइ फइगु जानकारी बियादिसें असार मसान्त तकया दुने सहभागि विद्यार्थीयात गुगुं नं छगू समस्या बियाः रचनात्मक समाधान यायेगु आविष्कार मेलाया ग्वसाः ग्वयेगु जुइ धयादिल । ‘प्रतिस्पर्धापाखें ज्याझ्वःया प्रभावकारिताया मूल्यांकन नं यायेगु व वइगु दिनय् गुकथं न्ह्याः वनेगु नं क्वःछीगु जुइ’, वय्कलं धयादिल ।

ज्याझ्वःया निंतिं महाराजगंजय् च्वंगु शिवपुरी माध्यमिक विद्यालययात ‘हब’या रुपय् छनोट याःगु दुसा ज्याझ्वः अन्तर्गत विज्ञान शिक्षक दथुइ कार्यशाला, भेला, विद्यालय दथुइ समन्वय, ज्याझ्वःया अनुगमन व प्रतिवेदन च्वयेगुलिइ सहजीकरण यायेगु ज्या विद्यालयं याइ ।