ने. सं. ११४६ चिल्लागा नवमी -

ब्लोदानया रक्तदाता दिवस क्वचाल

येँ – ब्लड डोनर्स एशोसियसन नेपाल (ब्लोदान)या ग्वसालय् छवाःयंकं जूगु विश्व रक्तदाता दिवस ज्याझ्वः तःजिक समापन जुल । समापन ज्याझ्वःया मूपाहां उपप्रधानमन्त्री नापं स्वास्थ्य व जनसंख्या मन्त्री उपेन्द्र यादवं ‘हिदान जीवनदान’या नारायात सार्थक यायेत लगे जुयाच्वंपिं स्वयमसेवी हिदातातय्गु भूमिका तसकं च्वछायेबहजू धासें थ्व स्वयां महान् मेगु ज्या छुं नं जुइमखु धयादिल ।

ज्याझ्वःया सभापतिलिसें ब्लोदानया कार्यवाहक अध्यक्ष रमेशध्वज बस्नेतं ज्याझ्वःया बारे कुलादिसें विश्व स्वास्थ्य संगठनया आह्वानय् सन् २००४ निसें ब्लोदानं विश्व रक्तदाता दिवस न्यायेका वयाच्वनागु जानकारी बियादिल । लिसें वय्कलं दिवसया निंतिं जक दिवस न्यायेकेगु मखसे स्वयमसेवी हिदान अभियानय् लगे जुयाच्वनादीपिं हिदाता व संघसंस्था नापं सहयोगीतय्त नं सुभाय् देछायेगु नापं सम्मान यायेगु विशेष दिंया रुपय् कायेमाःगु विचाः तयादीगु खः ।

ज्याझ्वलय् राष्ट्रिय जनस्वास्थ्य प्रयोगशालाया प्रमुख प्याथोलोजिष्ट कन्सल्टेन्ट डा. मुकुन्दा शर्मा, ब्लोदानया संस्थापक दुजः अर्जुनप्रसाद मैनाली, नेपाल हिमोफोलिया सोसाइटीया अध्यक्ष प्रा. डा. दीपक शाक्य, नेपाल थालिसिमिया सोसाइटीया अध्यक्ष दुर्गा पाठक, ब्लोदानया वरिष्ठ सल्लाहकार नापं दकलय् अप्वः हिदान यानादीम्ह शतक हिदाता नीता घिराइया, वरिष्ठ सल्लाहकार नापं संस्थापक दुजः सूर्यकुमारी श्रेष्ठ, नेपाल रेडक्रस सोसाइटी केन्द्रीय उप महामन्त्ती हरिप्रसाद न्यौपाने लगायतं भिंतुना न्वचु बियादीगु खः ।

अथे हे ज्याझ्वलय् ब्लोदानया गतिविधियात थःगु संचारमाध्यम व पत्रकारिताया क्षेत्रं योगदान बिउगु धासें नेपाल समाचारपत्रया प्रकाश श्रेष्ठ, स्वतन्त्र पत्रकार प्रेरणा शाक्य, विद्युतीय संचार माध्यम रेडियो उपत्यका, सुखावति फिल्म प्रोडक्सन लगायत थीथी संस्था व व्यक्तियात सम्मानं याःगु खः । थुकथं हे ज्याझ्वलय् स्वम्हेसित डायमन्ड पी, १३ म्हयात गोल्डेन पिन व २३ म्हेसित सिल्भर पीन नं लःल्हाःगु खः।