येँ महानगरपालिकां थायमदुया त्वाः छेँ थुनाबिल

येँ (नेपालभाषा टाइम्स)- येँ महानगरपालिकां थाय्मदुया त्वाःछेँ थुनाबिउगु दु । न्हापा नेपालभाषा मंकाः खलःया ज्याकु तयातःगु थुगु छेँ स्थानीयतय् विरोधया दथुइ शुक्रवाः न्हिनय् डोजर हयाः थुनाबिउगु खः । स्वतँ जाःगु थुगु त्वाःछेँय् न्हापां मंकाः खलःया ज्याकु लिसें येँ महानगरपालिका २८ वडाया ज्याकू, शहीद शुक्रराज क्लबया ज्याकु तयातःगु खः । थुगु छेँयात कयाः सर्वोच्च अदालतय् लानाच्वंगु मुद्दायात बेवास्ता यासें महानगरपालिकां छेँ थुनाबिउगु खँ स्थानीयतय्सं धाःगु दु ।

त्वाःछेँयात कयाः ताःई न्ह्यव निसें महानगरपालिका व स्थानीयतय् दथुइ विवाद ब्वलनाच्वंगु खः । महानगरपालिकां थ्व छेँ थुनाः वडा ज्याकू दयेकेगु निंतिं ताःई न्ह्यवनिसें कुतः यानाच्वंगु खःसा स्थानीयपिंसं त्वाःछेँ दुगु थाय् व छेँ स्थानीयपिंसं दयेकातःगु जूगुलिं स्थानीयवासितय् हे सामुदायिक भवन कथं दयाच्वनेमाःगु दावी याना वयाच्वंगु खः । थुकियात कयाः ताःई न्ह्यव निसें मुद्दा जुयाच्वंगु खःसा सर्वोच्च अदालतय् मुद्दा विचारधीन अवस्थाय् दुगु खः । अथे खःसां बिहिवाः २४ घन्टाया सुचं बियाः शुक्रवाः डोजर हयाः थुना हे बिउगु खः ।

बिहिवाः येँ महानगरपालिका २५ वडाया ज्याकुपाखें २४ घन्टा दुने छेँ खाली यायेत सुचं बिउगु खः । छेँ थुं वयेवं स्थानीयतय्सं टायर च्याकाः विरोध याःगु खःसा उमित पनेगु निंतिं सशस्त्र प्रहरी तकं हःगु खः ।

 

सम्बन्धित बुखँ

LEAVE YOUR COMMENTS