मांभासं आखः ब्वंकल धकाः मुद्दा

येँ – पाँचथरया छगू गाउँपालिका ज्याकुथिं थःगु थःगु क्षेत्रय् मांभासं आखः ब्वंकेगु धकाः याःगु निर्णयया विरुद्ध अनया नेपाल कम्युनिष्ट पार्टीया छम्ह कार्यकर्तां अदालतय् मुद्दा दायर याःगु दु ।

अनया फाल्गुनन्द गाउँपालिकां थःगु लागाया फुक्कं विद्यालयय् लिम्बु भासं आखः ब्वंकेगु धकाः याःगु निर्णयया विरोधय् स्थानीय नेकपा गाउँपालिका कमिटीया सचिव इन्द्रबहादुर आङदेम्बें उच्च अदालतय् मुद्दा दायर याःगु खः ।

आङदम्बें गाउँपालिकाया कार्यवाहक अध्यक्ष देवित्राकुमार आङदेम्बे, शिक्षा समितिया संयोजक नारायणप्रसाद आङदेम्बे, प्रमुख प्रशासकीय अधिकृत अनिल खत्री लगायत ४४ म्हेसित विपक्षी दयेकाः उगु मुद्दा तःगु खः । मांभासं आखः ब्वंकेगु धकाः याःगु निर्णय शिक्षा नियमावलीया अःखः धासें उकिया खारेज यायेत माग यासें उगु मुद्दा लाःगु खः ।

४० गू सरकारी स्कूल दुगु फाल्गुनन्द गाउँपालिकाय् थगुनेनिसें ९ गू स्कूलय् मांभासं नं आखः ब्वंकेगु व्यवस्था याःगु खः । थुगु दँय् मेगु १६ गू स्कूलय् नं मांभासं आखः ब्वंकेगु तयारी जुयाच्वंगु हे इलय् थ्व मुद्दा लाःगु खँ धाःगु दु ।

मांभासं आखः ब्वंकेगु लागिं गाउँपालिकां शिक्षकत नं माग यायेधुंकूगु दु । मुद्दा लाःगु जुयाः आः अदालतं छु फैसला याइ, वहे कथं जक मांभासं ब्वंकेगु वा मब्वंकेगु धकाः निर्णय याये फइगु खँ गाउँपालिकाया सूचना अधिकृत राजेन्द्र भट्टराईं कनादीगु दु ।