बुंगद्यः सालेगु झ्वलय् ज्वनातःपिं न्हय्म्हेसित त्वःतल, कन्हय् तक सकसितं त्वःतीगु

येँ – बुंगद्यः सालेगु झ्वलय् जूगु झडपय् ज्वनातःपिं मध्ये थौं न्हय्म्हय्सित त्वःतूगु दु । थुकिया लिसें ज्वनातःपिं झिम्हेसित त्वतेधुंकूगु दु । थौं सनिलय् तकया दुने यलया महेश वज्राचार्य, विन्दु महर्जन, सुविन शाक्य, रवि शाक्य, धुव्रराज वज्राचार्य व थिमिया श्याम कुमार था श्रेष्ठ व निराज वादेयात त्वःतूगु खँ ज्यापु समाजया नायः चन्द्र महर्जनं जानकारी बियादीगु दु । त्वःतूपिं मध्ये निरज वादे व श्याम कुमार थायात कोरोना पुष्टि जूगुलिं उमित ख्वपया खरिपाटीइ च्वंगु क्वारेन्टाइनय् यंकूगु दु । म्हिगः स्वम्हेसित त्वतूगु खः ।

नायः महर्जनया कथं ज्वनातःपिं मेपिंत नं त्वःतेगु निंतिं ज्या जुयाच्वंगु जानकारी नं बियादीगु दु । वय्कलं आः मेपिनि नं नागरिकता स्वयां रुजु यायेगु ज्या जुयाच्वंगु खँ धयादीगु दु । अथेहे यल महानगरपालिकाया मेयर चिरिबाबु महर्जनं कन्हय् तकया दुने सकसितं त्वःतीगु खँ धयादीगु दु ।

जात्राय् ज्वनातःपिंत त्वःतकेगु निंतिं थीथी ख्यलं कुतः जूगु खः । वय्कःपिंत त्वःतकेगु निंतिं ज्यापु समाज लिसें बुंगद्यः जात्रालिसे सरोकार झिंखुगूगु खलःपुचःया प्रतिनिधिपिं, नेपालभाषा मंकाः खलः यल, सांसदपिं, स्थानीय जनप्रतिनिधिपिं लगे जुयाच्वंगु खः । बुंगद्यः जात्रालिसे सम्बन्धित झिंगुंगू खलःपुचलं छगू मंकाः वक्तव्य नं पिथँसें ज्वनातःपिंत त्वःतेत माग याःगु खः ।

प्रतिनिधिपिंसं थौं हे यल जिल्लाया प्रमुख जिल्ला अधिकारी नारायणप्रसाद भट्टं ज्वनातःपिं सकसितं कन्हय् तकया दुने त्वःतेगु प्रतिबद्धता प्वंकूगु खः ।

अथेहे नेपालभाषा मंकाः खलःपाखें नं कुतः जूगु खः । अभियन्तापिंत त्वःतेकेगु निंतिं म्हिगः हे गृहमन्त्री नापलायेगु कथं ई मिले याःगु खःसां लिपा गृहमन्त्रालयं अभियन्तापिंत त्वःतेगु खँय् खःसा नापलायेगु आवश्यक मजू थःपिंसं त्वःताबीगु प्रतिबद्धता प्वंकाहःगु खँ मंकाः खलःया न्वकु मल्ल के सुन्दरं कनादीगु दु । वय्कःपिंत त्वःतकेगु निंतिं मंकाः खलःया नायः दुर्गालाल श्रेष्ठ व छ्याञ्जे मल्ल के. सुन्दरपिंसं कुतः यानादीगु खः ।