परिषदं उपाधि व सिरपाः लःल्हात
येँ – नेपालभाषा साहित्य परिषदं नेपालभाषा साहित्यया ख्यलय् ताःई न्ह्यवंनिसें मदिक्क योगदान बिया वयाच्वनादीपिं व्यक्ति व संस्थायात थीथी उपाधि व सिरपाः लःल्हात ।वंगु शनिवाः प्रज्ञा भवनय् जूगु छगू ज्याझ्वःया दथुइ परिषदं भाषाविज्ञ प्रा. तेजरत्न कंसाकारयात ने.सं. ११३९ दँया ‘भाषा थुवाः’ उपाधिं छायेपिउगु खः ।
अथे हे नागार्जुन पब्लिकेशनयात ‘चित्तधर सिरपाः’ व च्वमि शान्तराज शाक्ययात ‘पूर्ण–हिरा सिरपाः’ लःल्हाःगु खः ।कविकेशरी चित्तधर ‘हृदय’या ११३ क्वःगु बुन्हिया लसताय् लाकाः जूगु उगु ज्याझ्वः साहित्यकार छत्रबहादुर कायस्थया सभापतित्वय् जूगु खः । वय्कःपिंत परिषद्या पुलांम्ह नायःलिसें बौद्ध विद्वान फणिन्द्ररत्न वज्राचार्यं हनापौ व सिरपाः लःल्हानादीगु खः ।
मूपाहां वज्राचार्य व भाषा थुवाः उपाधिं सम्मानित जुयादीम्ह कंसाकारं थःथःगु नुगःखँ तयादीगु खःसा समालोचक पूर्ण ताम्राकारं समीक्षात्मक न्वचु तयादीगु खः ।उगु हे ज्याझ्वलय् कविकेशरी हृदयाया चिनाखँ व म्येँ मुना सपूm मूपाहां वज्राचार्य व सभानायः कायस्थं मंकाःकथं पितब्वज्या यानादीगु खः ।
LEAVE YOUR COMMENTS