न्हूदँ हनेत २६ गू समिति स्वन
येँ (नेपालभाषा टाइम्स)÷ नेपाल संवत् ११४३ न्हूदँ तःजिक न्यायेकेगु नितिं नेपाल संवत् राष्ट्रिय न्हूदँ समारोह समितिं थीथी समिति व उपसमिति यानाः २६ गू समितित नीस्वंगु दु ।
समारोह समितिया नायः प्रा.डा. नरेशमान बज्राचार्यया उपस्थितिइ म्हिगः बुधवाः येँया नेपाः ब्यांक्वेटय् च्वंगु मुँज्या थीथी समिति व उपसमिति नीस्वंगु खः ।
समारोह समितिं ब्यूगु जानकारी कथं कछलाथ्व पारुया न्हि कुन्हु येँया बसन्तपुरय् जुइगु भिंतुना ¥याली व भिंतुना सभा ताःलाकेगु नितिं व न्हूदँया भिंतुना सभा व ¥याली लिपा दच्छियंकं थीथी ज्याझ्वः यायेगु नितिं थथे उपसमिति नीस्वंगु खः ।
समारोह समितिं संचार उपसमिति, आर्थिक उपसमिति, स्वयंसेवक उपसमिति, सांस्कृतिक बाजा समन्वय उपसमिति, देय्न्यंक न्हूदँ ज्याझ्वः धलः उपसमिति, मिसा दुजः मनोनयन उपसमिति, क्रियाशील व्यक्तित्व मनोनयन उपसमिति, जातीय खलः पुचः उपसमिति, मञ्च व माइक व्यवस्थापन उपसमिति, गैरनेवाः मनोनयन उपसमिति, नासः पूजा ज्याझ्वः उपसमिति, न्हिल्याःपौं प्रकाशन उपसमिति, सांस्कृतिक ज्याझ्वः उपसमिति, मू नारा क्वःछिना उपसमिति, क्लब संघसंस्था परिचालन उपसमिति, नसात्वँसा व ज्याझ्वःया थाय् ब्यवस्थापन उपसमिति, माइन्युट पुस्तिका व्यवस्थापन उपसमितिलिसें थीथी उपसमितित नीस्वंगु खः ।
थथे नीस्वंगु उपसमितिया मुँज्या मोहनी नखः क्वचायेवं हे न्ह्याकेगु खँया जानकारी न्हूदँ समारोह समितिं ब्यूगु दु ।
अथेहे, न्हूदँ ११४३ या सकतां ज्याझ्वः न्ह्याकेगु नितिं १९ म्ह दुजः दुगु व्यवस्थापन समिति नं नीस्वंगु दु ।
LEAVE YOUR COMMENTS