क्षयरोग दिवसय् मंकाः स्वास्थ्य शिविर

ख्वप – विश्व क्षयरोग दिवसया लसताय् थनया थीथी संघसंस्था जानाः मंकाः निःशुल्क स्वास्थ्य शिविर ज्याझ्वः यात । ‘दक्वं तहया नेतृत्वतय्गु प्रतिवद्धता क्षयरोग मुक्त नेपालया सुनिश्चितता’ धइगु मूनारालिसें थीथी संघसंस्थाया सहकार्यय् स्वास्थ्य शिविर जूगु खः । ग्लिटर फ्युचर माध्यमिक विद्यालय वाराहीस्थानय् जूगु शिविर विद्यालयया हे प्रिन्सिपल नापं नेपाल रेडक्रस सोसाइटी वाराही उपशाखाया सभापति रामप्रसाद खाताख्वया सभापतित्वय् जूगु खः । ख्वप नगरपालिका वडा नं. ४ या वडाअध्यक्ष कुमार चवालं उलेज्या यानादीगु शिविरय् ४१२ म्हेसिया स्वास्थ्य परीक्षण याःगु खः । शिविरय् मिसाल्वय्, मचाल्वय्, हाडजोर्नी, फिजियोथेरापी, छातिल्वय् लिसें खै व वाया नं परीक्षण यायेगु ज्या जूगु खःसा निःशुल्क वासः नं इनेज्या जूगु शिविर आयोजक सदस्य जिनेश सितिखुं जानकारी बियादिल ।

शिविरया उलेज्या यासें वडाअध्यक्ष चवालं समुदायय् अस्पताल व क्लिनिकय् पहुँच मदुपिंत सेवा बी फइगुलिं थज्याःगु शिविरत संचालन यानाच्वनेमाः धासें ल्वय् सुचुकाः च्वने मजिउ धइगु सन्देश प्रवाह यायेगु निंतिं नं थज्याःगु शिविरत संचालन यानाच्वनेमाः धयादिल । ज्याझ्वलय् जिल्ला जनस्वास्थ्य कार्यालयया क्षयकुष्ठ अधिकृत तारा शर्मा, बासुदेवप्रसाद जोशी स्मृति प्रतिष्ठानया ओमचरण अमात्य, नेपाल रेडक्रस सोसाइटी ख्वप शाखाया मन्त्री परशुराम, नेपाल क्षयारोग निवारण संस्था जिल्ला शाखा ख्वपया सभापति राम सिख्वःपिंसं विश्व क्षयरोग दिवस व स्वास्थ्य शिविरया औचित्ययात कयाः नुगःखँ प्वंकादीगु खः । थीथी अस्पतालया चिकित्सकतय्सं स्वास्थ्य परीक्षण याःगु शिविरय् पीन्हय्म्हेसिया खै नं परीक्षण याःगु खः ।
उगु शिविर नेपाल क्षयरोग निवारण संस्था, बासुदेवप्रसाद जोशी स्मृति प्रतिष्ठान, ग्लिटर फ्युचर माध्यमिक विद्यालय, नेपाल रेडक्रस सोसाइटी बाराही उपशाखा, लायन्स क्लब अफ काठमाडौं समर्पित, तारामण्डल महिला सशक्तिकरण अभियान, खुड्किलो नेपाल व उपकार सेवा संस्था नेपालया मंकाः ग्वसालय् जूगु खः ।