थिमिया शंखधर चोक व दुवाकोट सिल

थिमि– मध्यपुर थिमि नगरपालिकाय् लाःगु शंखधर चोक व दुवाकोटयात सिल याःगु दु । म्हिगः मंगलवाः ख्वप जिल्लाय् लूपिं निम्ह कोरोना संक्रमितत थ्व हे लागाय् च्वंपिं जूगुलिं थुगु लागायात सिल याःगु खः ।

म्हिगः दुवाकोटय् च्वंम्ह छम्ह मिजं व शंखधर चोक लिक्कसं छथाय् बालं च्वनाच्वंम्ह मिसायाके कोरोना पुष्टि जूगु खः । थन च्वंपिंके कोरोना खनेदयेवं थौं बुधवाः सुथय् हे प्रहरी वनाः थ्व थाय्यात सिल याःगु खः । आः थ्व संक्रमिततय् ट्राभल हिस्ट्रि मालाः कन्ट्याक्ट ट्रेसिङ ज्या सुरु जुइधुंकूगु खँ धाःगु दु ।

शंखधर चोकय् लूम्ह संक्रमित मिसा सुनसरीया झुम्कां वयाः थन पासाया क्वथाय् च्वंवःम्ह खः । थ्व मिसा थः हे छम्ह नर्स जूगु व वया पासा नं नर्स जूगु खँ धाःगु दु ।

दुवाकोटय् लूम्ह मिजं धाःसा सशस्त्र प्रहरीया जवान जूगु खँ धाःगु दु । लछि न्ह्यव तक उम्ह मिजं नेकपा नेता व पुलांम्ह गृहमन्त्री भीम रावलया सुरक्षाय् खटे जुयाच्वंम्ह खः ।

सम्बन्धित बुखँ

LEAVE YOUR COMMENTS