मदुम्ह लक्ष्मीदासया झ्वाता तइगु

येँ – भाषासेवी, धर्मसेवी, उद्योगपति लिसें न्हूदँ समारोह समितिया सल्लाहकार समितिया कजि लक्ष्मीदास मानन्धरया झ्वाता तइगु जूगु दु । येँ महानगरपालिका १७ वडाया वडाध्यक्ष लिसें न्हूदँ समारोह समितिया दुजः नवीन मानन्धरं भाजु मानन्धरया झ्वाता येँया थँहिति त्वालय् तयेगु नितिं सहलह ब्याकेगु जानकारी बियादीगु दु ।

वय्कलं मदुम्ह भाजु मानन्धर साय्मि समुदाययात संगठित यायेगु नितिं न्ह्यलुवाः जुयाः न्ह्यचिउम्ह व्यक्तित्व जूगुलिं जाति भाषा धर्म व उद्योग, राजनीति व सामाजिक ज्याय् थःगु जिवंकाछि ज्या यानादीगुलिं वय्कःया लुमन्तिइ थ्व झ्वाता तयेगु तयारी यायेत्यनागु खँ कनादिल । थुकिया नितिं वडाबासी व वय्कः आबद्ध थीथी संघसंस्थानाप याकनं हे सहलह मुँज्या यायेत्यनागु जानकारी नं वय्कलं बियादीगु दु ।

लिसें न्हूदँ समारोह समितिपाखें उसाँय् मदयाच्वंम्ह वाङमय शताब्दी पुरुष सत्यमोहन जोशीया भिंउसाँय्या कामना याःगु दु । वय्कलं न्हूदँ समारोहयात इलय् ब्यलय् सल्लाह सुझाव बियादीगु खँ नं समितिं लुमंकूगु दु ।